نیو یارک،ورجینیا اور نیوجرسی میں اہم انتخابات آج

آج امریکی تاریخ میں اہم انتخابات ہو رہے ہیں جن پر پوری دنیا کی نظریں جمی ہوئی ہیں۔ نیو یارک شہر میں میئر کے لیے مقابلہ تین اہم امیدواروں کے درمیان ہے، جن میں مسلم امیدوار ظہران ممدانی، ری پبلکن حریف کرٹس سلوا اور آزاد امیدوار اینڈریو کومو شامل ہیں۔

پولنگ سے قبل، ڈیموکریٹک امیدوار ظہران ممدانی نے اپنے حامیوں کے ساتھ بروکلین بریج سے سٹی ہال تک مارچ کیا۔ اس دوران اپنے خطاب میں ممدانی نے صدر ٹرمپ اور دیگر مخالفین کی جانب سے مخالفت کو اپنی طاقت قرار دیا اور نیویارک میں رہائشی اخراجات کم کرنے کو اپنی ترجیح بتایا۔

صدر ٹرمپ اور ایلون مسک کی مخالفت کے باوجود مسلم امیدوار کے نیویارک کے پہلے مسلم میئر بننے کے امکانات روشن دکھائی دے رہے ہیں۔

اسی روز ورجینیا اور نیوجرسی میں بھی اہم انتخابات ہو رہے ہیں۔ ورجینیا میں ڈیموکریٹک پارٹی کی غزالہ ہاشمی لیفٹینینٹ گورنر کے عہدے کے لیے مقابلہ کر رہی ہیں۔ اگر وہ کامیاب ہوئیں، تو یہ ریاست میں ایک مسلم خاتون کے لیے تاریخی کامیابی ہوگی۔ غزالہ ہاشمی پچھلے سال اس ریاست کی دوسری بار سینیٹر منتخب ہوئی تھیں اور ان کے شوہر اظہر ہاشمی کا تعلق کراچی سے ہے۔

ورجینیا میں ڈیموکریٹک پارٹی کی دیگر امیدوار ایبی گیل اسپین برجر کا مقابلہ ری پبلکن امیدوار وینسم ارل سیئرز سے ہے۔ دلچسپ بات یہ ہے کہ جو بھی کامیاب ہو، وہ ریاست کی تاریخ میں پہلی خاتون گورنر ہوگی۔

نیوجرسی میں ڈیموکریٹک رہنما Mikie Sherrill کا مقابلہ ری پبلکن سابق رکن اسمبلی جیک Ciattarelli سے ہے۔ سروے کے مطابق مقابلہ سخت ہے، لیکن ڈیموکریٹک پارٹی کی امید ہے کہ فتح Sherrill کے مقدر میں ہوگی۔

کیلیفورنیا میں بھی ووٹرز اس بات کا فیصلہ کریں گے کہ اگلے سال ہونے والے مڈٹرم الیکشنز میں ڈیموکریٹک پارٹی یا ری پبلکنز کا پلڑا بھاری ہوگا۔ گورنر گیون نیوسم کا کہنا ہے کہ پروپوزیشن ففٹی کے ذریعے ریاست کانگریس انتخابات کے لیے حلقہ بندی پر مؤثر پیغام دے گی۔

ریاستوں میں پولنگ زیادہ تر صبح 7 بجے شروع ہوگی، جبکہ بعض میں صبح 5 یا 10 بجے سے پولنگ کا آغاز ہوگا۔