تاجکستان کے وزیر دفاع کی پاک فوج کے سربراہ سے ملاقات

تاجکستان کے وزیر دفاع کرنل جنرل صوبیروزودہ ایمومالی عبدالرحیم نے جنرل ہیڈکوارٹرز میں آرمی چیف فیلڈ مارشل سید عاصم منیر سے ملاقات کی، جس میں باہمی دلچسپی کے امور، علاقائی سلامتی اور دوطرفہ دفاعی تعاون پر تبادلہ خیال کیا گیا۔

پاک فوج کے شعبہ تعلقات عامہ آئی ایس پی آر کے مطابق اس ملاقات کے دوران دونوں رہنماؤں نے موجودہ فوجی تعاون کو مزید مستحکم کرنے کا عزم ظاہر کیا، خاص طور پر تربیت، دہشت گردی کے خلاف کارروائیوں، اور علاقائی سلامتی کے شعبوں میں۔ مہمان وزیر دفاع نے پاکستان آرمی کی پیشہ ورانہ کارکردگی کو سراہا اور خطے میں استحکام اور امن کے فروغ میں اس کے کردار کو تسلیم کیا۔

آرمی چیف نے علاقائی استحکام اور خوشحالی کے لیے اجتماعی کوششوں کی اہمیت پر زور دیتے ہوئے پاکستان کی تاجکستان کے ساتھ دفاعی اور سیکیورٹی تعلقات مضبوط کرنے کی مکمل وابستگی کا اعادہ کیا۔