نائجیریا میں گرلز اسکول پر حملہ،25 طالبات اغوا،وائس پرنسپل ہلاک

 

 نائجیریا کی ریاست کیبّی میں ایک سرکاری گرلز اسکول پر نامعلوم مسلح افراد نے حملہ کیا، جس کے نتیجے میں وائس پرنسپل حسن یعقوب مکُکو ہلاک اور 25 طالبات اغوا کر لی گئیں۔

پولیس کے مطابق واقعہ صبح تقریباً 4 بجے پیش آیا جب حملہ آور بھاری اسلحے سے لیس ہو کر اسکول میں داخل ہوئے۔ انہوں نے پہلے سکیورٹی اہلکاروں کے ساتھ فائرنگ کا تبادلہ کیا اور پھر دیوار پھلانگ کر ہاسٹل میں داخل ہو گئے، جہاں طالبات کو زبردستی لے گئے۔ اس دوران ایک اور اسکول ملازم بھی زخمی ہوا۔

حکام نے اضافی پولیس یونٹس، فوج اور مقامی رضاکار فورسز کو اردگرد کے علاقوں اور جنگلات میں سرچ اینڈ ریسکیو آپریشن کے لیے تعینات کر دیا ہے۔

نائجیریا کے شمال مغربی علاقوں میں بڑے پیمانے پر اغوا اور تاوان کے واقعات میں مسلسل اضافہ دیکھا جا رہا ہے۔ ماہرین کے مطابق اسکولز، گاؤں اور شاہراہیں مسلح گینگز کے نشانے پر ہیں اور حکومتی یقین دہانیوں کے باوجود سیکیورٹی صورتحال بدستور تشویشناک ہے۔

واضح رہے کہ 2014 میں شمال مشرقی شہر چیبوک سے بوکو حرام نے 270 سے زائد طالبات کو اغوا کیا تھا، جن میں سے کئی آج تک واپس نہیں لوٹیں۔