ویزا نہ ملنے پر امریکہ کو فیفا ڈرا بائیکاٹ کی ایرانی دھمکی

تہران: ایران نے امریکا کی جانب سے ویزے جاری نہ کیے جانے پر فیفا ورلڈ کپ 2026 کے لیے 5 دسمبر کو واشنگٹن میں ہونے والی قرعہ اندازی کی تقریب کے بائیکاٹ کا اعلان کردیا ہے۔

ایرانی فٹبال فیڈریشن کے ترجمان عامر مہدی علوی کے مطابق امریکی حکام نے ایرانی وفد کو مکمل ویزے جاری نہیں کیے۔ ان کا کہنا ہے کہ امریکا نے ایرانی ٹیم کے ہیڈ کوچ سمیت صرف 4 آفیشلز کو ویزے دیے، جبکہ ایران فٹبال فیڈریشن کے صدر مہدی تاج کو ویزا دینے سے انکار کردیا گیا۔

ترجمان نے امریکی فیصلے کو کھیلوں کے اصولوں کی خلاف ورزی قرار دیا اور کہا کہ کھیلوں کو سفارتی تنازعات سے الگ رکھا جانا چاہیے۔ رپورٹس کے مطابق ایران فٹبال فیڈریشن نے باضابطہ طور پر اپنا فیصلہ فیفا کو بھی آگاہ کردیا ہے۔

یاد رہے کہ ایران نے مارچ میں فیفا ورلڈ کپ 2026 کے لیے کوالیفائی کیا تھا۔