امریکی یونیورسٹی میں فائرنگ سے 2 ہلاکتیں۔ 8زخمی

امریکہ کی ایک یونیورسٹی میں امتحانات کے دوران فائرنگ سے 2 ہلاکتیں ہوئی ہیں۔حکام نے بتایا کہ روڈ آئی لینڈ کے پروویڈنس میں واقع براؤن یونیورسٹی کی بارس اینڈ ہولی عمارت میں فائرنگ کے نتیجے میں2 افراد ہلاک اور 8 دیگر کو تشویشناک لیکن مستحکم حالت میں اسپتال میں داخل کرایا گیا ہے۔ تاہم پروویڈنس کے میئر بریٹ سمائلی نے خبردار کیا ہے کہ ہلاکتوں کی تعداد بڑھ سکتی ہے۔حکام نے بتایا کہ حراست میں کوئی مشتبہ نہیں۔ حکام نے بتایا کہ شوٹر کو سیاہ لباس میں ملبوس ایک مرد بتایا گیا تھا، اور وہ بارس اینڈ ہولی انجینئرنگ اور فزکس کی عمارت کے ہوپ اسٹریٹ کی طرف بھاگا تھا۔

میرین ون پر وائٹ ہاؤس پہنچنے پر صدر ٹرمپ نے کہاکہ انہیں شوٹنگ کے بارے میں بریفنگ دی گئی ہے۔مجھے براؤن یونیورسٹی کی صورتحال کے بارے میں مکمل طور پر آگاہ کیا گیا ہے۔یہ کتنی خوفناک چیز ہے، اور ہم ابھی صرف یہ کر سکتے ہیں کہ متاثرین اور ان لوگوں کے لیے دعا کریں جو بہت بری طرح زخمی ہوئے ۔انہوں نے مرنے والوں اور شدید زخمیوں کے لیے دکھ کا اظہار کیا۔

پولیس نے ایک بندوق بردار کی مختصر تفصیل جاری کی۔محکمے کے ڈپٹی چیف پروویڈنس پولیس کمانڈر ٹموتھی اوہارا نے ایک نیوز کانفرنس میں کہاکہ ابتدائی طور پر، ہمارے پاس صرف ایک مشتبہ شخص ہے جو سیاہ لباس میں ملبوس ایک مرد تھا۔یہ معلوم نہیں کہ وہ عمارت میں کیسے داخل ہوا، لیکن ہم جانتے ہیں کہ وہ اس کمپلیکس کی ہوپ اسٹریٹ کی طرف سے باہر نکلا۔
انہوں نے کہا کہ پولیس کو براؤن یونیورسٹی کی ایک عمارت کے اندر ایک شوٹر کی کال موصول ہوئی، افسران پہنچے لیکن انہیں کوئی مشتبہ شخص نہیں ملا۔ہم اس کو تلاش کرنے کے لیے ہر ممکن وسائل بروئے کار لا رہے ہیں۔

سی این این کے مطابق فائرنگ کا واقعہ انجینئرنگ اور فزکس کی عمارت میں پیش آیا جہاں سہ پہر کو متعدد امتحانات ہورہے تھے۔ ایک طالب علم نے بتایا کہ وہ عمارت کو خالی کرنے کے لیے پولیس کے انتظار میں دو گھنٹے تک اپنی میز کے نیچے چھپا رہا۔

یونیورسٹی کے پرووسٹ کا کہناہےکہ طلباء اس عمارت میں اپنے آخری امتحانات دے رہے تھے جہاں فائرنگ کا واقعہ پیش آیا۔ عمارت میں 2 سے 5 بجے کے درمیان فائنل امتحان تھے
میئر نے بتایا کہ فائرنگ کیمپس کے مشرقی جانب بارس اور ہولی کی عمارت میں ہوئی۔ عمارت سات منزلہ اونچی ہے اور اس میں براؤن کا انجینئرنگ اور فزکس کا شعبہ شامل ہے۔

براؤن ایک نجی آئیوی لیگ ریسرچ یونیورسٹی ہے اور ملک کے قدیم ترین اعلیٰ تعلیمی اداروں میں سے ایک ہے۔