بگ بیش لیگ میں شاداب خان کا شاندار کم بیک،سڈنی تھنڈر کو پہلی فتح

پاکستانی آل راؤنڈر شاداب خان ٹی ٹوئنٹی ورلڈکپ سے قبل ایک بار پھر فارم میں آ گئے ہیں۔ لیگ اسپنر نے بگ بیش لیگ سیزن 15 میں شاندار بولنگ کا مظاہرہ کرتے ہوئے اکیلے ہی اپنی ٹیم سڈنی تھنڈر کو پہلی کامیابی دلا دی۔

پیر کو مانوکا اوول میں کھیلے گئے میچ میں سڈنی تھنڈر نے برسبین ہیٹ کو 34 رنز سے شکست دی۔ پہلے بیٹنگ کرتے ہوئے سڈنی تھنڈر کے اوپنرز سیم کونسٹس اور میتھیو گلکس نے شاندار آغاز فراہم کیا اور سنچری شراکت قائم کی، جس کی بدولت ٹیم نے مقررہ 20 اوورز میں 4 وکٹوں کے نقصان پر 193 رنز اسکور کیے۔

سیم کونسٹس نے 45 گیندوں پر 63 رنز بنائے جس میں 8 چوکے شامل تھے، جبکہ میتھیو گلکس 48 گیندوں پر 76 رنز کے ساتھ نمایاں رہے۔ وکٹ کیپر بیٹر سیم بلنگز نے آخری اوورز میں 11 گیندوں پر 25 رنز کی جارحانہ اننگز کھیلی جس میں 2 چوکے اور 2 چھکے شامل تھے۔ برسبین ہیٹ کی جانب سے شاہین شاہ آفریدی نے 4 اوورز میں 35 رنز دے کر ایک وکٹ حاصل کی، جبکہ جیک وائلڈرمتھ نے 2 اور میتھیو کوہن مین نے ایک وکٹ حاصل کی۔

ہدف کے تعاقب میں برسبین ہیٹ کی ٹیم 20 اوورز میں 6 وکٹوں کے نقصان پر 159 رنز ہی بنا سکی۔ کوئی بھی بیٹر نصف سنچری نہ بنا سکا، جس کی بڑی وجہ شاداب خان کی تباہ کن بولنگ رہی۔ شاداب خان نے ٹاپ آرڈر کو تہس نہس کرتے ہوئے مکولن منرو، جیک وائلڈرمتھ اور میٹ رینشاؤ کی اہم وکٹیں حاصل کیں۔

برسبین ہیٹ کی جانب سے ہیو ویبن نے 26 گیندوں پر 30 رنز بنا کر کچھ مزاحمت دکھائی جبکہ میکس برائنٹ نے 18 گیندوں پر 25 رنز اسکور کیے، تاہم دیگر بیٹرز خاطر خواہ کارکردگی دکھانے میں ناکام رہے۔

شاداب خان میچ کے نمایاں کھلاڑی ثابت ہوئے، انہوں نے 4 اوورز میں صرف 24 رنز دے کر 4 وکٹیں حاصل کیں اور اپنی ٹیم کو سیزن کی پہلی جیت دلوا دی۔ شاداب کی اس شاندار کارکردگی کے بعد سوشل میڈیا پر آئندہ ٹی ٹوئنٹی ورلڈکپ میں ان کی قومی ٹیم میں شمولیت پر بحث بھی شروع ہو گئی ہے۔