پاکستان نے اسرائیل کے صومالی لینڈ کو آزاد ریاست تسلیم کرنے کے اعلان کو مسترد کردیا

اسلام آباد: پاکستان کی وزارت خارجہ نے کہا ہے کہ وہ صومالیہ کی خودمختاری، اتحاد اور علاقائی سالمیت کے تحفظ کے لیے کوشاں ہے اور اسرائیل کی جانب سے صومالی لینڈ کو بطور آزاد ریاست تسلیم کرنے کے اعلان کو مسترد کرتا ہے۔

وزارت خارجہ کے ترجمان نے بیان میں کہا کہ یہ اقدام بین الاقوامی قانون کی کھلی خلاف ورزی ہے اور نہ صرف صومالیہ کے امن اور استحکام کو خطرے میں ڈالتا ہے بلکہ پورے خطے کے امن کے لیے بھی خطرہ ہے۔ انہوں نے عالمی برادری پر زور دیا کہ وہ ایسی کارروائیوں کو مسترد کرے اور اسرائیل کو خطے میں امن و استحکام کے لیے جاری کوششوں کو نقصان پہنچانے سے روکے۔

ترجمان نے مزید کہا کہ پاکستان صومالیہ کی خودمختاری اور دیرپا امن و استحکام کے حصول کے لیے کی جانے والی تمام کوششوں کی مکمل حمایت کرتا ہے۔ انہوں نے فلسطینی عوام کے حقِ خودارادیت اور ایک آزاد، خودمختار فلسطینی ریاست کے قیام کے لیے اپنی غیر متزلزل حمایت کا بھی اعادہ کیا، جو 1967 کی سرحدوں پر قائم ہو اور جس کا دارالحکومت القدس الشریف ہو۔

دوسری طرف سعودی عرب نے بھی صومالیہ کی خودمختاری اور علاقائی سالمیت کی مکمل حمایت کا اعلان کیا اور اسرائیل اور صومالی لینڈ کے درمیان باہمی تسلیم کے اقدام کو مسترد کیا۔ امریکی صدر نے بھی صومالی لینڈ کو آزاد ریاست کے طور پر تسلیم کرنے کے امکان کی حمایت نہیں کی۔

واضح رہے کہ امریکا کا اہم اتحادی ملک اسرائیل صومالی لینڈ کو تسلیم کرنے والا پہلا ملک بن گیا ہے۔