میرسرفراز بگٹی بگٹی قبائل کے آٹھویں چیف منتخب،دستاربندی تقریب آ ج

وزیراعلیٰ بلوچستان میر سرفراز بگٹی کو بگٹی قبائل کے قبائلی نظام میں چیف آف بگٹیز کی ذمہ داری سونپنے کا فیصلہ کر لیا گیا ہے۔ قبائلی عمائدین کی مشاورت کے بعد میر سرفراز بگٹی کو بگٹی قبائل کا آٹھواں چیف منتخب کیا گیا۔

اس موقع پر قبائلی عمائدین نے میر سرفراز بگٹی کی کامیابی اور سلامتی کے لیے دعا کی۔ چیف آف بگٹیز کی باقاعدہ دستار بندی کی تقریب آج ڈیرہ بگٹی کے علاقے بیکڑ میں منعقد ہوگی، جہاں انہیں قبائلی روایت کے مطابق دستار پہنائی جائے گی۔

تقریب میں بگٹی قبائل کے تمام چیف وڈیرے اور قبائلی معتبرین شرکت کریں گے، جن میں شمبانی، کلپر، موندرانی، پیروزانی، نوتھانی اور ڈومب قبائل کے سربراہان شامل ہوں گے۔ اس کے علاوہ نواب بگٹی خاندان کے افراد بھی خصوصی طور پر شریک ہوں گے اور قبائلی روایت کے مطابق دستار بندی کی رسم ادا کریں گے۔