پاکستان سٹاک ایکسچینج میں تیزی،انڈیکس بلند ترین سطح پر پہنچ گیا

کراچی: پاکستان سٹاک ایکسچینج میں مثبت رجحان برقرار ہے اور کاروباری ہفتے کے دوسرے روز بھی مارکیٹ میں زبردست تیزی دیکھی گئی۔ ہنڈرڈ انڈیکس میں 800 سے زائد پوائنٹس کے اضافے کے ساتھ انڈیکس ایک لاکھ 74 ہزار 805 پوائنٹس کی بلند ترین سطح پر پہنچ گیا۔

اہم شعبوں میں بھرپور خریداری دیکھی گئی، جن میں گاڑی ساز کمپنیاں، سیمنٹ، تجارتی بینک، کھاد، تیل و گیس کی تلاش کرنے والی کمپنیاں، آئل مارکیٹنگ کمپنیاں، بجلی کی پیداوار اور ریفائنریز شامل ہیں۔ ایس ایس جی سی، پی او ایل، پی ایس او، پی پی ایل، او جی ڈی سی، ماری، ایم ای بی ایل، ایم سی بی، ایس این جی پی ایل اور این بی پی بھی مثبت زون میں رہیں۔

گزشتہ کاروباری روز کے اختتام پر ہنڈرڈ انڈیکس 1,495 پوائنٹس کے اضافے کے ساتھ ایک لاکھ 73 ہزار 896 پوائنٹس کی سطح پر بند ہوا تھا، جس کے بعد آج کی تیزی نے مارکیٹ کو تاریخ کی بلند ترین سطح پر پہنچا دیا ہے۔