ویڈیو:یمنی عالمِ دین شیخ علی الثنانی دوران تدریسِ قرآن انتقال کرگئے

یمن کے معروف قرآن کے معلم اور عالمِ دین شیخ ڈاکٹر علی محمد الثنانی قرآن کی تدریس کے دوران اچانک انتقال کرگئے۔

شیخ ڈاکٹر علی محمد الثنانی کے انتقال سے قبل کے آخری لمحات کیمرے کی آنکھ میں محفوظ ہوگئے۔

سوشل میڈیا پر وائرل ویڈیو میں یمنی عالمِ دین کو یمن کے صوبہ مأرب میں قرآن کی درس و تدریس میں مصروف دیکھا جا سکتا ہے، جہاں اچانک ان کی آنکھیں بند ہو جاتی ہیں اور وہ کرسی سے نیچے گر پڑتے ہیں۔

غیر ملکی میڈیا رپورٹس کے مطابق شیخ ڈاکٹر علی الثنانی رمَیلہ کے علاقے میں واقع نورہ مسجد میں حفاظِ قرآن کی نگرانی کر رہے تھے۔

وہ معمول کے مطابق ایک طالب علم کی تلاوت توجہ سے سن رہے تھے اور ان کے ہاتھ میں قرآنِ مجید موجود تھا کہ اسی دوران ان کا انتقال ہو گیا۔

واضح رہے کہ مرحوم عالمِ دین نے اعلیٰ تعلیمی امتیاز کے ساتھ پی ایچ ڈی کی ڈگری حاصل کی تھی۔