لکی مروت اور بنوں میں دہشت گردوں کی فائرنگ سے 4 پولیس اہلکار شہید

لکی مروت اور بنوں میں نامعلوم موٹر سائیکل سواروں کی فائرنگ سے تین ٹریفک اہلکار جبکہ بنوں میں ایک پولیس اہلکار شہید ہوگئے۔

تفصیلات کے مطابق لکی مروت میں سرائےنورنگ کےقریب نامعلوم موٹر سائیکل سواروں نے ٹریفک پولیس پر فائرنگ کردی،جس کے نتیجے میں 3 اہلکار شہید ہوگئے۔

پولیس کا کہنا ہےکہ شہید ہونےوالوں میں سرائے نورنگ ٹریفک انچارج جلال خان،سپاہی عزیزالہ اور سپاہی عبداللہ شامل ہیں،ٹریفک اہلکار بنوں لکی سڑک پر معمول کی ڈیوٹی پرموجود تھے۔واقعہ کی اطلاع ملتے ہی پولیس کی بھاری نفری موقع پر پہنچ گئی، پولیس کا کہنا ہے کہ حملہ آور موقع سے فرار ہوگئے ہیں،جن کی تلاش کیلئے آپریشن جاری ہے۔

دوسری جانب، بنوں کے تھانہ منڈان کی حدود کفشی خیل میں پولیس اہلکار رشید خان موٹر سائیکل سواروں کی فائرنگ سے شہید ہوگیا۔

ترجمان پولیس کے مطابق بنوں ریجن میں چار گھنٹوں کے دوران چار پولیس اہلکار شہید ہوگئے۔