ٹرمپ کا گرین لینڈ پر قبضے کا منصوبہ،یورپی یونین نے خبردار کر دیا

گرین لینڈ کی حکومت نے واضح اعلان کیا ہے کہ وہ کسی بھی صورت امریکا کے جزیرے پر قبضے کو قبول نہیں کرے گی۔ یہ بیان امریکی صدر ڈونلڈ ٹرمپ کے اس مؤقف کے بعد سامنے آیا جس میں انہوں نے کہا تھا کہ امریکا گرین لینڈ کو کسی نہ کسی طریقے سے اپنے کنٹرول میں لے گا۔

گرین لینڈ کی حکومت نے کہا کہ جزیرہ ایک خودمختار جمہوری معاشرہ ہے، جو اپنے فیصلے خود کرتا ہے اور بین الاقوامی قوانین کے تحت عمل کرتا ہے۔ انہوں نے مزید کہا کہ گرین لینڈ ڈنمارک کی خودمختار سلطنت کا حصہ ہے اور نیٹو کے رکن ہونے کے ناطے اس کا دفاع نیٹو کے فریم ورک کے تحت ہونا چاہیے۔

صدر ٹرمپ نے کہا کہ گرین لینڈ امریکا کی قومی اور عالمی سلامتی کے لیے نہایت اہم ہے اور اگر امریکا کنٹرول حاصل نہ کرے تو روس یا چین ایسا کر سکتے ہیں۔ انہوں نے یہ بھی کہا کہ امریکا جزیرے کے ساتھ معاہدہ کرنے کے لیے تیار ہے، تاہم نتیجہ امریکا کے حق میں ہوگا۔

یورپی یونین کے کمشنر برائے دفاع نے خبردار کیا ہے کہ اگر امریکا نے فوجی طریقے سے گرین لینڈ پر قبضہ کیا تو یہ نیٹو کے لیے شدید بحران ثابت ہو سکتا ہے۔ گزشتہ ہفتے فرانس، جرمنی، اٹلی، پولینڈ، اسپین اور برطانیہ نے ڈنمارک کے ساتھ مشترکہ بیان میں گرین لینڈ کی خودمختاری کی حمایت کی تھی۔

گرین لینڈ نے 1979 کے بعد اندرونی خودمختاری حاصل کی ہے اور عوام امریکی قبضے کے سخت مخالف ہیں۔