پاکستان اور یو اے ای کے درمیان پری امیگریشن کلیئرنس معاہدہ

اسلام آباد: پاکستان اور متحدہ عرب امارات نے مسافروں کے لیے سفری سہولیات میں اضافے کے مقصد سے پری امیگریشن کلیئرنس کے نظام پر باضابطہ اتفاق کر لیا ہے۔ یہ پیش رفت وفاقی وزیر داخلہ محسن نقوی اور متحدہ عرب امارات کے اعلیٰ سطحی وفد کے درمیان ملاقات کے دوران سامنے آئی۔

وفاقی وزیر داخلہ سے یو اے ای کے وفد کی قیادت ڈائریکٹر جنرل کسٹمز و پورٹ سیکیورٹی احمد بن لاحج الفلاسی نے کی۔ ملاقات میں دوطرفہ تعلقات، باہمی تعاون اور امیگریشن کے عمل کو مزید آسان اور مؤثر بنانے پر تفصیلی گفتگو کی گئی۔

محسن نقوی نے بتایا کہ پری امیگریشن کلیئرنس کے تحت مسافروں کی امیگریشن اور متعلقہ کارروائی پاکستان میں ہی مکمل کی جائے گی، جس کے بعد متحدہ عرب امارات پہنچنے پر انہیں طویل امیگریشن مراحل سے نہیں گزرنا پڑے گا۔ اس نظام کا آغاز ابتدائی طور پر کراچی سے پائلٹ بنیادوں پر کیا جائے گا۔

وزیر داخلہ کے مطابق اس سہولت کے تحت مسافر یو اے ای پہنچ کر ڈومیسٹک سفر کی طرز پر سیدھا ایئرپورٹ سے باہر نکل سکیں گے، جس سے وقت کی بچت ہوگی اور سفر کا مجموعی تجربہ بہتر ہوگا۔

یو اے ای کے وفد نے اس اقدام کو دونوں ممالک کے عوام کے لیے فائدہ مند قرار دیتے ہوئے مکمل تعاون کی یقین دہانی کرائی۔ پائلٹ منصوبے کے انتظامی اور تکنیکی امور کو حتمی شکل دینے کے لیے متعلقہ اداروں کے درمیان رابطہ کاری جاری رہے گی، جبکہ کامیابی کی صورت میں اس نظام کو دیگر شہروں تک وسعت دی جائے گی۔

وفد میں ایگزیکٹو ڈائریکٹر ڈیجیٹل ٹرانسفارمیشن جما عبداللہ القابی، ایگزیکٹو ڈائریکٹر ایئرپورٹس حماد سیف المشغونی سمیت دیگر اعلیٰ حکام شامل تھے۔ ملاقات میں وزیر مملکت برائے داخلہ طلال چوہدری اور وفاقی سیکرٹری داخلہ خرم آغا بھی موجود تھے۔