غزہ بورڈآف پیس قائم۔اسلامی ملکوں سے بھی شخصیات شامل۔ امریکی جرنیل امن فورس کا کمانڈرمقرر

 

امریکی صدرکے دفتر نے غزہ امن منصوبے کے تحت امن کونسل قائم کردی ہے، امریکہ، یورپ اور اسلامی ملکوں سے بھی شخصیات شامل ہیں۔ استحکام فورس کے لیے امریکی جرنیل کو کمانڈر مقررکیا گیاہے۔

ڈونلڈ ٹرمپ نے سابق برطانوی وزیر اعظم ٹونی بلیئر کو غزہ کے بورڈ آف پیس میں نامزد کیا ہے، جوامریکی صدر کے 20 نکاتی منصوبے کی نگرانی کرے گا۔وائٹ ہاؤس نے کہا ہے کہ بلیئر بورڈ کے سات بانی ایگزیکٹو ممبران میں شامل ہوں گے، ان کے ساتھ ٹرمپ کے داماد جیرڈ کشنر، امریکی وزیر خارجہ مارکو روبیو اور مشرق وسطیٰ کے لیے امریکی خصوصی ایلچی اسٹیو وِٹکوف بھی بورڈ کا حصہ ہوں گے۔دیگر ارکان میں چیف ایگزیکٹو اپالو گلوبل مینجمنٹ مارک روون،صدرورلڈبینک اجے بنگا اورٹرمپ کے سابق مشیر سلامتی رابرٹ گیبریل شامل ہیں۔

یہ اعلان وٹکوف کی جانب سے غزہ پر اسرائیل کی جنگ کو ختم کرنے کے لیے امریکی ثالثی کے منصوبے کے دوسرے مرحلے کے آغاز کے اعلان کے چندروز بعد سامنے آیا ہے۔
ٹائمزآف اسرائیل کے مطابق، بانی ایگزیکٹو بورڈسفارت کاری، ترقی، بنیادی ڈھانچے اور اقتصادی حکمت عملی میں تجربہ رکھنے والے رہنماؤں پر مشتمل ہے۔

وائٹ ہاؤس کا کہنا ہے کہ ایگزیکٹو بورڈ کا ہر رکن غزہ میں استحکام اور طویل مدتی کامیابی کے لیے ایک متعین پورٹ فولیو کی نگرانی کرے گا، جس میں حکومتی صلاحیت کی تعمیر، علاقائی تعلقات، تعمیر نو، سرمایہ کاری کی ، بڑے پیمانے پر فنڈنگ، اور سرمایہ کاری شامل ہیں، لیکن ان تک محدود نہیں۔

 

مزید پڑھیں:غزہ امن منصوبے کا دوسرامرحلہ شروع ۔سابق فلسطینی وزیر عبوری انتظامیہ کے سربراہ

 

غزہ ایگزیکٹو بورڈ کے نام سے سینئر حکام کی ایک دوسری کمیٹی بھی قائم کی گئی ہے، جومؤثر طرز حکمرانی اور غزہ میں امن، استحکام اور خوشحالی کو آگے بڑھانے والی بہترین خدمات کی فراہمی میں مدد کرے گی۔اس دوسری کمیٹی کے ارکان میں وٹکوف، کشنر، بلیئر، روون، ترک وزیر خارجہ ہاکان فیدان، سینئر قطری سفارت کار علی تھاوادی، مصری انٹیلی جنس کے سربراہ حسن رشاد، متحدہ عرب امارات کے بین الاقوامی تعاون کے وزیر ریم الہاشمی، اسرائیلی،قبرصی تاجر یاکر گابے، اقوام متحدہ کے سابق کوآرڈینیٹر برائے مشرق وسطیٰ اور سی آئی اے کے سابق مشیر برائے انسانی امور نکولے ملاڈینوف شامل ہیں۔ملاڈینوف غزہ کے لیے اعلیٰ نمائندے کے طور پر بھی کام کریں گے۔