سعودی عرب، امریکا اور چین کا سانحہ گل پلازہ پر گہرے افسوس کا اظہار

کراچی: سعودی عرب، امریکا اور چین نے سانحہ گل پلازہ پر گہرے افسوس اور تعزیت کا اظہار کیا ہے۔

سعودی عرب نے متاثرہ خاندانوں، حکومت پاکستان اور عوام کے ساتھ ہمدردی کا اظہار کیا۔ امریکی قونصل خانے نے کہا کہ امریکا جاں بحق افراد کے لواحقین کے غم میں برابر کا شریک ہے اور ریسکیو اور فائر فائٹر اہلکاروں کی جرات کو خراجِ تحسین پیش کرتا ہے۔

چینی قونصلیٹ جنرل نے بھی گل پلازہ حادثے میں جاں بحق افراد کے لواحقین کے ساتھ ہمدردی کا اظہار کیا اور زخمیوں کے لیے نیک تمناؤں کا اعادہ کیا۔

واضح رہے کہ سانحے میں اب تک 28 افراد ہلاک ہو چکے ہیں جبکہ 17 لاشیں ناقابل شناخت ہیں۔ شناخت کے لیے 50 فیملیز کے ڈی این اے سیمپل موصول ہو چکے ہیں۔

فائر افسر کے مطابق تہہ خانے کے اوپن ایریا کو سرچ کر لیا گیا ہے، تاہم دبا ہوا حصہ ابھی تلاش طلب ہے، جبکہ عمارت کے دوسرے اور تیسرے فلور کلیئر ہیں۔

سانحہ گل پلازہ کی وجوہات معلوم کرنے کے لیے تحقیقاتی کمیٹی نے اپنا کام شروع کر دیا ہے۔