امریکہ میں شدید برفانی طوفان،درجہ حرارت منفی 49 ڈگری تک پہنچ گیا

 

امریکہ کے متعدد علاقوں میں شدید برفانی طوفان سے زندگی مفلوج ہو گئی ہے اور درجہ حرارت انتہائی حد تک گر گیا ہے۔ غیر ملکی میڈیا رپورٹس کے مطابق نیویارک کے دیہی علاقوں میں درجہ حرارت منفی 49 ڈگری تک پہنچ گیا، جبکہ اس طوفان کے نتیجے میں کم از کم 7 افراد ہلاک ہو چکے ہیں۔

طوفان کے اثرات واشنگٹن، نیویارک، ٹیکساس، اوکلاہوما اور نیوجرسی سمیت درجنوں ریاستوں میں محسوس کیے جا رہے ہیں۔ شدید برفباری اور سرد ہواؤں کے باعث 16 ہزار سے زائد پروازیں منسوخ ہو گئی ہیں، جبکہ تقریباً 8 لاکھ افراد بجلی کی سہولت سے محروم ہو گئے ہیں۔

انٹرنیشنل میڈیا کے مطابق 24 ریاستوں میں ایمرجنسی نافذ کر دی گئی ہے اور 40 ریاستوں میں تقریباً 24 کروڑ افراد اس طوفان سے متاثر ہونے کا خدشہ رکھتے ہیں۔

نیویارک کی گورنر کیتھی ہوچل کا کہنا ہے کہ یہ کئی برسوں کا سب سے شدید موسمِ سرما ہے۔ نیویارک کے مختلف علاقوں میں 8 سے 18 انچ تک برف پڑنے کی توقع ہے اور شہریوں کو غیر ضروری طور پر گھروں سے باہر نہ نکلنے کی ہدایت کی گئی ہے۔

واشنگٹن اور گردونواح میں 6 سے 10 انچ برف باری متوقع ہے، جس کے پیش نظر وفاقی دفاتر بند کر دیے گئے ہیں اور سکولوں میں آن لائن کلاسز کا آغاز کر دیا گیا ہے۔

محکمہ موسمیات کے مطابق اس شدید برفانی طوفان کے اثرات اگلے ہفتے تک برقرار رہنے کا امکان ہے، اور شہریوں سے ہدایت کی گئی ہے کہ وہ احتیاطی تدابیر اختیار کریں۔