امریکا میں شدید برفانی طوفان،معمولاتِ زندگی ٹھپ،30 افرادہلاک

 

امریکا میں طاقتور برفانی طوفان نے معمولاتِ زندگی بری طرح متاثر کر دیے ہیں، شدید سردی اور برفباری کے نتیجے میں مختلف حادثات میں کم از کم 30 افراد ہلاک ہو چکے ہیں۔ واشنگٹن، نیویارک، ٹیکساس، اوکلاہوما اور نیوجرسی سمیت متعدد ریاستیں شدید سرد موسم کی لپیٹ میں ہیں۔

خراب موسمی حالات کے باعث ملک بھر میں تقریباً 19 ہزار پروازیں منسوخ کر دی گئیں، جبکہ واشنگٹن میں وفاقی دفاتر بند ہیں۔ آرکنساس سے نیو انگلینڈ تک کئی علاقوں میں ایک فٹ سے زیادہ برف پڑ چکی ہے، جس کے باعث سڑکیں بند اور تعلیمی اداروں میں تدریسی سرگرمیاں معطل کر دی گئی ہیں۔

پٹسبرگ کے شمالی علاقوں میں 20 انچ تک برفباری ریکارڈ کی گئی، جہاں درجہ حرارت منفی 31 ڈگری سینٹی گریڈ تک گر گیا۔ بعض علاقوں میں دہائیوں کی شدید ترین سردی محسوس کی جا رہی ہے۔ نیویارک سٹی میں کھلے مقامات سے 8 افراد کی لاشیں ملنے کی اطلاعات ہیں۔

برفانی طوفان اور بارشوں کے باعث 10 لاکھ سے زائد افراد بجلی سے محروم ہو گئے ہیں، جبکہ محکمہ موسمیات نے 44 ریاستوں کے تقریباً 20 کروڑ شہریوں کیلئے شدید سردی کی وارننگ جاری کی ہے۔ 24 ریاستوں میں ہنگامی حالت نافذ کر دی گئی ہے۔

محکمہ موسمیات کا کہنا ہے کہ آئندہ دنوں میں سردی کی شدت برقرار رہنے کا امکان ہے، جبکہ مشرقی ساحلی علاقوں کو ایک اور برفانی طوفان کا سامنا بھی کرنا پڑ سکتا ہے۔