بلوچستان میں پہلی مرتبہ آرٹیفیشل انٹیلیجنس کےذریعے سرکاری بھرتیاں مکمل

کوئٹہ: پاکستان کی تاریخ میں پہلی بار صوبہ بلوچستان نے 100 سے زائد سرکاری آسامیوں پر بھرتیوں کا عمل آرٹیفیشل انٹیلیجنس (AI) کے ذریعے مکمل کیا، جسے ایک سنگِ میل قرار دیا جا رہا ہے۔

تفصیلات کے مطابق، 18 جنوری بلوچستان کی انتظامی تاریخ میں ایک تاریخی دن کے طور پر یاد رکھا جائے گا۔ صوبائی محکمۂ خزانہ میں سب اکاؤنٹنٹس کی بھرتیاں مکمل طور پر AI نظام کے تحت کی گئیں، جس میں سوالات کی تیاری، امتحان، جانچ، شارٹ لسٹنگ اور تقرری کے احکامات تک ہر مرحلہ خودکار نظام کے ذریعے مکمل ہوا۔

وزیراعلیٰ بلوچستان سرفراز بگٹی نے کامیاب امیدواروں میں تقرری کے خطوط تقسیم کیے، جبکہ انتخاب کا عمل کسی سلیکشن بورڈ کے ذریعے نہیں بلکہ AI الگورتھم نے خود انجام دیا۔

اس نظام کو تیار کرنے میں عمران زرقون نے AI گورننس اور ہیومن ریسورس مینجمنٹ کے اصولوں کے تحت ایک فریم ورک تیار کیا، جس کا مقصد بھرتیوں میں شفافیت، رفتار اور کم لاگت کو یقینی بنانا تھا۔ 30 ہزار سوالات پر مشتمل سوالیہ بینک کی بنیاد پر ہر امیدوار کے لیے منفرد پرچہ تیار کیا گیا، اور امتحان مکمل ہونے کے فوراً بعد نتائج مرکزی اسکرین پر ظاہر کیے گئے، جہاں امیدوار کا نام اور ضلع بھی سب کے سامنے تھا۔

اس تجربے نے ثابت کیا کہ مصنوعی ذہانت کے ذریعے سرکاری بھرتیوں میں انسانی تعصب اور اقربا پروری کو ختم کیا جا سکتا ہے، اور یہ عمل مستقبل میں پورے ملک کے لیے ماڈل بن سکتا ہے۔