ایلون مسک نے واٹس ایپ کو غیر محفوظ میسجنگ ایپ قرار دے دیا

ایکس پر کی گئی ایک پوسٹ میں ایلون مسک کا کہنا تھا کہ واٹس ایپ محفوظ نہیں ہے اور نہ ہی سگنل ایپ کو مکمل طور پر محفوظ کہا جا سکتا ہے۔ انہوں نے ایکس چیٹ کو ان دونوں ایپس کا محفوظ متبادل قرار دیا۔

ایلون مسک کی یہ پوسٹ ایسے وقت سامنے آئی ہے جب امریکا کی ایک عدالت میں واٹس ایپ کے خلاف مقدمہ دائر کیا گیا ہے، جس میں اس کے اینڈ ٹو اینڈ انکرپشن کے دعوے کو چیلنج کیا گیا ہے۔

مقدمے میں الزام لگایا گیا ہے کہ میٹا اور واٹس ایپ ممکنہ طور پر صارفین کے نجی پیغامات تک رسائی حاصل کر سکتے ہیں۔ یہ مقدمہ آسٹریلیا، میکسیکو اور جنوبی افریقہ کے صارفین کی جانب سے دائر کیا گیا ہے، جن کا کہنا ہے کہ واٹس ایپ میں مکمل سکیورٹی تحفظ موجود نہیں۔

عدالتی دستاویزات کے مطابق الزام ہے کہ میٹا کے ملازمین صارفین کے نجی پیغامات تک رسائی حاصل کرتے ہیں۔ اس کیس میں میٹا کے ایک نامعلوم وسل بلوور کے بیان کو بنیاد بنایا گیا، جس نے دعویٰ کیا کہ کمپنی کے اندرونی سسٹمز انکرپشن کو بائی پاس کر کے پیغامات تک رسائی حاصل کر سکتے ہیں۔

مقدمے میں یہ بھی کہا گیا ہے کہ اس رسائی کے ذریعے ملازمین مکمل میسج ہسٹری دیکھ سکتے ہیں، حتیٰ کہ ڈیلیٹ کیے گئے پیغامات بھی۔ تاہم مقدمے میں اس حوالے سے کوئی تکنیکی شواہد پیش نہیں کیے گئے۔

دوسری جانب میٹا نے ان الزامات کو مسترد کرتے ہوئے انہیں بے بنیاد اور مضحکہ خیز قرار دیا ہے۔