امریکا میں شدید برفباری،ہلاکتیں 65 تک پہنچ گئیں،فضائی نظام درہم برہم

امریکا کے مختلف حصوں میں شدید برفباری اور سخت سردی نے نظامِ زندگی مفلوج کر دیا ہے، جہاں مختلف حادثات کے نتیجے میں ہلاکتوں کی تعداد 65 ہو گئی ہے۔ مشرقی امریکا میں درجہ حرارت نقطۂ انجماد سے بھی نیچے گر چکا ہے، شکاگو میں منفی 14 جبکہ کلیولینڈ میں منفی 11 ڈگری سینٹی گریڈ ریکارڈ کیا گیا۔

ٹینیسی اور مسیسیپی میں وقفے وقفے سے ہونے والی شدید برفباری کے باعث ایک لاکھ سے زائد صارفین بجلی سے محروم ہو گئے ہیں۔ برفانی طوفان کے بعد فضائی سفر بھی شدید متاثر ہے، گزشتہ روز امریکن ایئرلائنز کی 653 پروازیں منسوخ جبکہ ایک ہزار سے زائد پروازیں تاخیر کا شکار رہیں۔

ڈیلس فورٹ ورتھ ایئرپورٹ پر برفباری اور بارش کے باعث فضائی آپریشن بری طرح متاثر ہوا۔ امریکی میڈیا کے مطابق ایئرلائنز نے عملے کی کمی کو پورا کرنے کے لیے اضافی شفٹس پر ڈبل تنخواہ کی پیشکش بھی کی ہے۔

محکمہ موسمیات کا کہنا ہے کہ نیویارک اور نیو جرسی میں تیز اور سرد ہواؤں کا امکان ہے جبکہ شدید سردی کی لہر آئندہ ہفتے تک برقرار رہنے کی پیشگوئی کی گئی ہے۔