اٹلی کے شہر تورین میں مظاہرین اور پولیس میں جھڑپیں،100اہلکار زخمی

 

اٹلی کے شہر تورین میں احتجاج کے دوران مظاہرین اور پولیس کے درمیان جھڑپیں ہوئیں، جن کے نتیجے میں 100 سے زائد پولیس اہلکار زخمی ہو گئے۔

پولیس ذرائع کے مطابق احتجاج کے دوران بعض مظاہرین نے پولیس پر پتھراؤ کیا جس کے باعث صورتحال کشیدہ ہو گئی۔ حالات پر قابو پانے کے لیے پولیس نے واٹر کینن کا استعمال کرتے ہوئے مظاہرین کو منتشر کیا۔

جھڑپوں کے بعد شہر کے مختلف علاقوں میں سکیورٹی کے سخت انتظامات کیے گئے جبکہ کئی سڑکیں عارضی طور پر ٹریفک کے لیے بند رہیں۔ شہریوں کو متبادل راستے اختیار کرنے کی ہدایت کی گئی۔

واقعے پر ردعمل دیتے ہوئے اطالوی وزیراعظم جارجیا میلونی نے تشدد کی مذمت کی اور کہا کہ عوامی املاک اور قانون نافذ کرنے والے اداروں پر حملے کسی صورت قابلِ قبول نہیں۔ انہوں نے امن و امان برقرار رکھنے اور قانون کی عملداری یقینی بنانے پر زور دیا۔