اسلام آباد میں ریڈ الرٹ، شہر میں داخلے کے متعدد راستے بند

وفاقی دارالحکومت میں سکیورٹی خدشات کے پیش نظر ریڈ الرٹ جاری کر دیا گیا ہے جبکہ شہر میں داخلے اور باہر جانے والے کئی اہم راستے کنٹینرز لگا کر بند کر دیے گئے ہیں۔

ذرائع کے مطابق ممکنہ خطرات کے پیش نظر سکیورٹی اداروں نے شہر کے مختلف علاقوں میں سرچ آپریشن شروع کر دیا ہے۔ پولیس اور دیگر قانون نافذ کرنے والے ادارے مشتبہ افراد کی تلاش کے لیے مختلف مقامات پر کارروائیاں کر رہے ہیں۔

حکام کا کہنا ہے کہ شہر کے داخلی اور خارجی راستوں پر سکیورٹی چیکنگ سخت کر دی گئی ہے۔ گاڑیوں کی مکمل تلاشی لی جا رہی ہے جبکہ شناخت کی جانچ پڑتال بھی کی جا رہی ہے۔

سکیورٹی اداروں کے مطابق شہریوں سے اپیل کی گئی ہے کہ وہ سکیورٹی اہلکاروں کے ساتھ تعاون کریں اور کسی بھی مشتبہ سرگرمی کی فوری اطلاع متعلقہ حکام کو دیں۔