آبنائے ہرمزپرکنٹرول کے لیے تجاویز بھی چارملکی اجلاس کے ایجنڈے پر

آبنائے ہرمزپرکنٹرول بھی چارملکی اجلاس کے ایجنڈے پر ہے۔جرمن نشریاتی ادارے نے روئٹرز کے حوالے سے بتایا ہے کہ مذاکرات سے واقف پانچ ذرائع کے مطابق پاکستان میں ملاقات کرنے والے ممالک نے واشنگٹن کو بحری ٹریفک اور آبنائے ہرمز کو دوبارہ کھولنے سے متعلق تجاویز پیش کی ہیں، جو جہاز رانی کے بہاؤ کو مستحکم کرنے کی وسیع تر کوششوں کا حصہ ہیں۔

پاکستان کے ایک ذریعے نے بتایا کہ مصر سمیت دیگر تجاویز اتوار کے اجلاس سے قبل پاکستان کی جانب سے وائٹ ہاؤس کو بھجوائی گئی تھیں اور ان میں نہر سویز کی طرز پر فیس وصولی کے نظام کا ڈھانچہ شامل تھا۔

دو دیگر پاکستانی ذرائع نے بتایا کہ ترکی، مصر اور سعودی عرب اس آبی گزرگاہ کے ذریعے تیل کے بہاؤ کے انتظام کے لیے ایک کنسورشیم بنا سکتے ہیں، اور انہوں نے پاکستان سے بھی اس میں شرکت کی درخواست کی ہے۔

ذرائع نے بتایا کہ منیجمنٹ کنسورشیم کی تجویز پر امریکہ اور ایران کے ساتھ بات چیت کی گئی ہے۔ پہلے پاکستانی ذریعے نے بتایا کہ ملک کے آرمی چیف عاصم منیر امریکی نائب صدر جے ڈی وینس کے ساتھ مستقل رابطے میں رہے ہیں۔

یہ معاملہ پاکستانی وزیرخارجہ اسحاق ڈار اور ان کے ایرانی ہم منصب عباس عراقچی کے درمیان ہفتے کی شام فون کال کے بعد نمایاں ہوا۔ عراقچی کے سرکاری ٹیلیگرام چینل پر پوسٹ کی گئی ایک ریڈ آؤٹ کے مطابق، ڈار نے انہیں جنگ کو فوری طور پر روکنے کے لیے چار ممالک کی کوششوں سے آگاہ کیا۔

وزراء کی کال کے بعد اعتماد سازی کے ابتدائی اقدام کے طور پر، اسلام آباد نے اعلان کیا کہ تہران نے 20 پاکستانی پرچم والے بحری جہازوں کو آبنائے ہرمز سے روزانہ دو کی شرح سے گزرنے کی اجازت دینے پر اتفاق کیا ہے۔ یہ اقدام امریکیوں کو یہ بتانے کے لیے بنایا گیا ہے کہ وہ آبنائے ہرمز کو کھولنے میں کسی حد تک کامیاب رہے ہیں۔