شیر افضل مروت کا سہیل آفریدی کے بطور وزیرِ اعلیٰ انتخاب کو چیلنج کرنے کا اعلان

اسلام آباد: قومی اسمبلی کے رکن شیر افضل مروت نے کہا ہے کہ سہیل آفریدی کے بطور وزیرِ اعلیٰ انتخاب کو چیلنج کرنے جا رہا ہوں۔

ایک بیان میں شیر افضل مروت نے کہا ہے کہ خیبر پختون خوا کی تباہی اور خراب گورننس کا حشر زبان زد عام ہے، کے پی ہیلتھ سیکٹر اور ہسپتالوں میں کم قیمت میں دوائیاں خریدی بیچی جا رہی ہیں۔

علی امین گنڈاپور کو میرے چیلنج کرنے کا معلوم ہوا تو اس نے کہا ایسا نہیں کرنا، میں علی امین گنڈاپور کی بات کو اب رد کر رہا ہوں اور انتخاب کو چیلنج کروں گا۔

شیر افضل مروت نے کہا کہ بانی پی ٹی آئی بمقابلہ نواز شریف کیس میں سپریم کورٹ نے فیصلہ دے رکھا ہے، 2018ء میں نواز شریف کے سینیٹر کی ٹکٹوں پر بانی عدالت گئے۔

سپریم کورٹ نے فیصلہ دیا کہ سزا یافتہ جیل سے کوئی احکامات نہیں دے سکتا، بانی پی ٹی آئی کے حکم پر سلمان اکرم راجہ نے اڈیالہ کے باہر نامزدگی کا بتایا تھا۔میں نامزدگی عدالت میں چیلنج کر رہا ہوں، اُمید ہے سہیل آفریدی گھر جائیں گے، میری کوئی ذاتی عداوت نہیں لیکن سہیل آفریدی کو لانے کا فیصلہ غلط تھا، ان کو لانے کے فیصلے نے پارٹی کو توڑ کر رکھ دیا ہے۔