جنیوا میں معاہدے پر دستخط کی میزبانی پاکستان کرے گا-وزیراعظم کا اعلان

اسلام آباد: وزیراعظم شہباز شریف نے قومی اسمبلی سے خطاب کرتے ہوئے کہا ہے کہ دنیا نے امن کی جانب ایک تاریخی قدم اٹھایا ہے اور ایران و امریکا کے درمیان جنگ کے خاتمے اور امن معاہدے کی پیش رفت ایک بڑی سفارتی کامیابی ہے۔

وزیراعظم کے مطابق 19 جون کو جنیوا میں ہونے والی امن معاہدے کی دستخطی تقریب پاکستان کی میزبانی میں منعقد کی جائے گی۔ انہوں نے کہا کہ یہ لمحہ پاکستان سمیت پوری عالمی برادری کے لیے خوشی اور فخر کا باعث ہے۔

شہباز شریف نے کہا کہ طویل اور مشکل مذاکراتی عمل کے بعد ایران اور امریکا نے تمام محاذوں پر جنگ کے مستقل خاتمے پر اتفاق کیا ہے، جو سفارتکاری اور مکالمے کی فتح ہے۔

انہوں نے اس موقع پر مختلف عالمی رہنماؤں کا شکریہ ادا کرتے ہوئے کہا کہ امریکی صدر، ایرانی قیادت، قطر کے امیر، سعودی ولی عہد، ترک صدر اور چین کی قیادت نے اس عمل میں اہم کردار ادا کیا۔

وزیراعظم نے مذاکراتی ٹیموں کی کوششوں کو سراہتے ہوئے کہا کہ مشکل حالات میں صبر، دانشمندی اور تحمل نے اس عمل کو کامیابی تک پہنچایا۔

انہوں نے کہا کہ پاکستان کے فیلڈ مارشل عاصم منیر نے بھی امن کے قیام اور کشیدگی کم کرنے میں اہم کردار ادا کیا۔

شہباز شریف نے ایوان میں ایران کے سفیر ڈاکٹر رضا امیری مقدم کو خوش آمدید کہا اور کہا کہ یہ تاریخی لمحہ پاکستان کے ہر شہری کے لیے فخر کا باعث ہے۔

وزیراعظم نے پاکستان کے تمام صوبوں، آزاد کشمیر اور گلگت بلتستان کے عوام کو مبارکباد دیتے ہوئے کہا کہ پاکستان نے ایک بار پھر ثابت کیا ہے کہ وہ امن، مکالمے اور استحکام کا علمبردار ملک ہے۔