نیٹو کے سربراہی اجلاس میں شرکت کے لیے امریکی صدر ترکی پہنچ گئے

انقرہ:امریکی صدر ڈونلڈ ٹرمپ شمالی اوقیانوس کے معاہدے کی تنظیم (نیٹو) کے سالانہ سربراہی اجلاس 2026 میں شرکت کے لیے ترکی کے دارالحکومت انقرہ پہنچ گئے ہیں۔ ترکی کے صدر رجب طیب اردگان نے منگل کے روز نیٹو کے دو روزہ تاریخی سربراہی اجلاس کے آغاز پر امریکی صدر ڈونلڈ ٹرمپ کا دارالحکومت انقرہ پہنچنے پر پرجوش استقبال کیا۔

ترک صدر رجب طیب اردگان کی جانب سے صدارتی محل (بیش تپے صدارتی کمپلیکس) میں امریکی ہم منصب ڈونلڈ ٹرمپ کے اعزاز میں ایک پروقار اور شاندار سرکاری استقبالیہ تقریب منعقد کی گئی، جہاں دونوں رہنماؤں کو گارڈ آف آنر بھی پیش کیا گیا۔

ذرائع کے مطابق، استقبالیہ تقریب کے فوری بعد دونوں رہنماؤں کے درمیان صدارتی محل میں ون آن ون (دوطرفہ) ملاقات اور بعد ازاں وفود کی سطح پر اہم مذاکرات کا دور شروع ہوگا۔ ان اعلیٰ سطحی مذاکرات میں معاشی و دفاعی تعاون سمیت اہم ترین علاقائی اور بین الاقوامی امور، خصوصاً نیٹو اتحاد کے مستقبل، دفاعی بجٹ اور مشرقِ وسطیٰ کی حالیہ سیکیورٹی صورتحال پر تفصیلی تبادلۂ خیال کیا جائے گا۔ مانا جا رہا ہے کہ دونوں ممالک کے مابین یہ ملاقات عالمی سیاست کے تناظر میں انتہائی اہمیت کی حامل ہے۔

نیٹو کا 2026 سربراہی اجلاس منگل کے روز یعنی آج ترکی کے دارالحکومت انقرہ میں شروع ہو رہا ہے، جس میں 32 رکن ممالک کے سربراہان اور متعدد شراکت دار ممالک کے نمائندے آئندہ دو روز تک اعلیٰ سطحی مذاکرات میں شرکت کریں گے۔

ترکی کے سرکاری خبر رساں ادارے انادولو کے مطابق اجلاس کے دوران دفاعی اخراجات میں اضافے، یوکرین کے لیے طویل المدتی حمایت اور نیٹو کے دفاعی صنعتی ڈھانچے کو مزید مضبوط بنانے سے متعلق امور سرفہرست رہنے کی توقع ہے۔

نیٹو کے سیکریٹری جنرل مارک روٹے اور دیگر حکام کا کہنا ہے کہ یورپی ممالک اس سربراہی اجلاس کے ذریعے یہ پیغام دینا چاہتے ہیں کہ وہ دفاعی اخراجات میں اضافے سے متعلق اپنے وعدوں پر عمل درآمد کر رہے ہیں۔ اجلاس کے دوران بڑے دفاعی معاہدوں کے اعلانات بھی متوقع ہیں۔