ایران سے جنگ نہیں،صرف جوہری پروگرام ہدف ہے:ٹرمپ

امریکی صدر ڈونلڈ ٹرمپ نے ایران کے ساتھ جاری کشیدگی کو باقاعدہ جنگ قرار دینے سے انکار کرتے ہوئے کہا ہے کہ موجودہ کارروائیوں کا مقصد صرف ایران کی جوہری صلاحیت کو محدود کرنا ہے، نہ کہ وسیع پیمانے پر جنگ چھیڑنا۔

صدارتی طیارے ایئرفورس ون میں صحافیوں سے گفتگو کرتے ہوئے صدر ٹرمپ نے کہا کہ موجودہ صورتحال کو مکمل جنگ کہنا درست نہیں ہوگا۔ ان کے مطابق امریکی اقدامات کا بنیادی مقصد ایران کو جوہری ہتھیار حاصل کرنے سے روکنا اور اس کی جوہری صلاحیت کو ختم کرنا ہے۔

انہوں نے کہا کہ امریکا نہیں چاہتا کہ ایران کے پاس جوہری ہتھیار ہوں، اور ان کے بقول عالمی برادری کو بھی اس مقصد کی حمایت کرنی چاہیے کیونکہ یہ علاقائی اور عالمی سلامتی سے جڑا معاملہ ہے۔

صدر ٹرمپ نے اپنی گفتگو میں ایک بار پھر یہ دعویٰ بھی دہرایا کہ اپنے دورِ صدارت کے دوران انہوں نے آٹھ مختلف تنازعات اور جنگوں کے خاتمے میں کردار ادا کیا۔

یہ بیان ایسے وقت میں سامنے آیا ہے جب امریکا اور ایران کے درمیان حالیہ فوجی کارروائیوں کے بعد خطے میں کشیدگی برقرار ہے اور دونوں ممالک کے درمیان صورتحال پر عالمی برادری کی گہری نظر ہے۔