ایران پرحالیہ امریکی حملوں میں ہلاکتوں کی تعداد 24 ہو گئی ، آج بھی 4 افراد جاں بحق

تہران : ایران پر امریکی فورسز کی جانب سے فضائی اور میزائل حملوں کا سلسلہ تیز ہو گیا ہے، جس کے نتیجے میں اب تک کم از کم 24 افراد کے جاں بحق ہونے کی تصدیق ہو چکی ہے۔

ایرانی میڈیا اور حکام کے مطابق، حملوں کے تازہ ترین مرحلے میں آج بھی مزید 4 افراد اپنی جان سے ہاتھ دھو بیٹھے ہیں۔

تازہ ترین صورتحال کے مطابق صوبہ خوزستان (آبادان): مہر نیوز ایجنسی کی رپورٹ کے مطابق امریکی میزائلوں نے مغربی صوبے خوزستان کے شہر آبادان میں تین مختلف مقامات کو نشانہ بنایا۔ ان حملوں میں 2 افراد جاں بحق جبکہ 3 شدید زخمی ہوئے ہیں۔

صوبہ اصفہان (نائین): اصفہان صوبے کے ڈپٹی گورنر نے تصدیق کی ہے کہ نائین شہر میں واقع ایک فوجی اڈے پر امریکی حملے کے نتیجے میں 1 شخص جاں بحق ہوا ہے۔

ماہشہر (زرعی واٹر پمپنگ اسٹیشن): ایرانی ذرائع ابلاغ کے مطابق، امریکی فورسز نے ماہشہر میں ایک زرعی پانی کے پمپنگ اسٹیشن پر بھی بمباری کی، جہاں ڈیوٹی پر موجود 1 اہلکار جاں بحق اور 4 دیگر افراد زخمی ہو گئے۔

ایران کے محکمہ صحت اور مقامی حکام کا کہنا ہے کہ زخمیوں کو قریبی ہسپتالوں میں منتقل کر دیا گیا ہے جن میں سے بعض کی حالت تشویشناک بتائی جاتی ہے، جس کے باعث ہلاکتوں میں مزید اضافے کا خدشہ ہے۔ عبوری جنگ بندی کے خاتمے کے بعد سے خطے میں کشیدگی انتہائی سنگین حد تک بڑھ چکی ہے۔