بھارت کے لیے پاکستانی فضائی حدودکی بندش میں مزید ایک ماہ توسیع

پاکستان نے بھارت کے لیے اپنی فضائی حدود کی بندش میں مزید ایک ماہ کی توسیع کر دی ہے۔

پاکستان ائیرپورٹ اتھارٹی نے حکومتی ہدایت پر نیا نوٹم جاری کر دیا، جس کے تحت بھارت کے لیے پاکستان کی فضائی حدود کی بندش 24 اگست 2026 تک برقرار رہے گی۔

نوٹم کے مطابق اس مدت کے دوران بھارتی رجسٹرڈ طیاروں کے لیے پاکستان کی فضائی حدود استعمال کرنے پر پابندی ہوگی۔

نوٹم میں کہا گیا ہے کہ پاکستان نے بھارتی ائیرلائنز، آپریٹرز کے زیرِ انتظام، ملکیت یا لیز پر لیے گئے طیاروں، بشمول فوجی پروازوں، کے لیے اپنی فضائی حدود پر عائد پابندی میں توسیع کر دی ہے، جو 24 اگست 2026 تک مؤثر رہے گی۔

واضح رہے کہ پاکستان نے بھارت کے لیے اپنی فضائی حدود 23 اپریل 2025 سے بند کر رکھی ہے۔