آبنائے ہرمز کے قریب آئل ٹینکر پر میزائل حملہ

آبنائے ہرمز کے جنوبی حصے میں ایک تیل بردار بحری جہاز میزائل حملے کا نشانہ بن گیا، جس کے بعد عملے کو حفاظتی اقدامات کے تحت جہاز چھوڑ کر لائف بوٹس کے ذریعے محفوظ مقام پر منتقل کیا گیا۔

برطانیہ کے ادارے یو کے میری ٹائم ٹریڈ آپریشنز (UKMTO) نے واقعے کی تصدیق کرتے ہوئے بتایا کہ حملہ آبنائے ہرمز کے جنوب میں پیش آیا، تاہم متاثرہ بحری جہاز یا اس کے مالک کی شناخت ظاہر نہیں کی گئی۔

واقعے سے چند گھنٹے قبل ایران کے پاسدارانِ انقلاب نے دعویٰ کیا تھا کہ دو آئل ٹینکرز آبنائے ہرمز کے جنوب میں ایک ایسے بحری راستے سے گزرنے کی کوشش کر رہے تھے جسے ایران نے “خلاف ورزی” قرار دیا۔

ایرانی بیان کے مطابق ان دونوں بحری جہازوں پر دھماکوں کے بعد آگ بھڑک اٹھی اور وہ اپنی حرکت جاری نہ رکھ سکے، جبکہ امدادی ٹیمیں عملے کو محفوظ مقام پر منتقل کرنے میں مصروف رہیں۔

تاحال یہ واضح نہیں ہو سکا کہ برطانوی ادارے کی جانب سے جس آئل ٹینکر کا ذکر کیا گیا، آیا وہی جہاز ایرانی بیان میں شامل دو ٹینکروں میں سے ایک تھا یا نہیں۔

واقعے کے بعد آبنائے ہرمز میں بحری سلامتی اور عالمی توانائی کی ترسیل سے متعلق خدشات ایک بار پھر بڑھ گئے ہیں، جبکہ اس حوالے سے مزید تفصیلات سامنے آنے کا انتظار کیا جا رہا ہے۔