عمران خان کی صحت پر سیاست نہیں ہوئی، نہ ہوگی:رانا ثناء اللہ

اسلام آباد: وزیراعظم کے مشیر اور سینیٹر رانا ثناء اللہ نے کہا ہے کہ حکومت نے سپریم کورٹ کے 18 اگست کے فیصلے پر نیک نیتی کے ساتھ عملدرآمد کیا ہے اور صحت کے معاملے کو سیاسی مسئلہ نہیں بنایا گیا۔

سینیٹ میں اظہار خیال کرتے ہوئے رانا ثناء اللہ نے کہا کہ عدالتوں کو آئین اور قانون کے مطابق فیصلے کرنے ہوتے ہیں۔ ان کے مطابق حکومت سے کہا جا رہا ہے کہ وہ عدالت کا کردار ادا نہ کرے، تاہم یہی اصول تمام متعلقہ فریقین پر بھی لاگو ہونا چاہیے۔

انہوں نے کہا کہ بانی پی ٹی آئی کو طبی معائنے کے لیے اسپتال لے جایا گیا، جہاں ماہر ڈاکٹروں نے ان کا مکمل طبی معائنہ کیا۔ حکومت کا مؤقف ہے کہ اس اقدام کے ذریعے سپریم کورٹ کے حکم پر عملدرآمد کیا گیا۔

رانا ثناء اللہ کے مطابق بانی پی ٹی آئی کو شفا انٹرنیشنل اسپتال منتقل کرنے کی صورت میں سکیورٹی اور امن و امان کے حوالے سے مسائل پیدا ہونے کا خدشہ تھا، اسی لیے انہیں متبادل طبی سہولت فراہم کی گئی۔

انہوں نے پاکستان تحریک انصاف کے مؤقف پر تنقید کرتے ہوئے کہا کہ پارٹی کی جانب سے بانی پی ٹی آئی کے طبی معائنے سے متعلق مختلف تفصیلات سامنے لائی گئیں، جن سے ظاہر ہوتا ہے کہ ان کا طبی معائنہ ڈاکٹروں کے پینل نے کیا تھا۔

وزیراعظم کے مشیر نے واضح کیا کہ حکومت کے نزدیک صحت کا معاملہ سیاسی تنازع نہیں بننا چاہیے اور نہ ہی ماضی میں اسے سیاست کا حصہ بنایا گیا، نہ آئندہ ایسا کیا جائے گا۔