بچوں میں سوشل میڈیا کی لت کے مقدمات، میٹا 18 ارب ڈالر ادا کرنے پر رضامند
متعدد امریکی ریاستیں میٹا سے تقریباً 200 ارب ڈالر تک کے سول جرمانوں کا مطالبہ کرنے والی تھیں
میٹا پلیٹ فارمز نے بچوں کو فیس بک اور انسٹاگرام کا عادی بنانے اور ان کی حفاظت سے متعلق عوام کو گمراہ کرنے کے الزامات پر امریکا کی تقریباً تمام ریاستوں کے ساتھ ایک بڑے معاہدے پر اتفاق کر لیا ہے۔ اس معاہدے کے تحت کمپنی کو 18 ارب ڈالر تک ادا کرنے پڑ سکتے ہیں، جس کے بعد اس کے خلاف وفاقی سطح پر جاری مقدمے کی کارروائی ختم ہو گئی ہے۔
اس تصفیے سے قبل کیلیفورنیا، کولوراڈو، کینٹکی اور نیو جرسی سمیت متعدد امریکی ریاستیں میٹا سے تقریباً 200 ارب ڈالر تک کے سول جرمانوں کا مطالبہ کر رہی تھیں۔ اگرچہ اس معاہدے کے نتیجے میں میٹا کے بنیادی کاروباری ماڈل میں کوئی بڑی تبدیلی نہیں آئے گی، تاہم یہ تصفیہ نوجوان صارفین کو فیس بک اور انسٹاگرام کی خدمات فراہم کرنے کے طریقہ کار میں نمایاں تبدیلیوں کی راہ ہموار کرے گا۔
کولوراڈو کے اٹارنی جنرل فل ویزر نے اس پیش رفت پر گفتگو کرتے ہوئے کہا کہ اس مقدمے کا بنیادی مقصد بچوں کا تحفظ تھا اور معاہدے کے تحت حاصل ہونے والی مراعات انتہائی اہم ہیں، جو ان کے بقول عدالت کی جانب سے عائد کیے جانے والے ممکنہ احکامات سے بھی کہیں زیادہ آگے ہیں۔
ماہرین کے مطابق یہ اہم معاہدہ سوشل میڈیا کمپنیوں کے خلاف زیرِ التوا ہزاروں دیگر مقدمات کے حل کے لیے ایک بڑی مثال بن سکتا ہے۔ دنیا بھر میں حکومتیں بچوں کو نقصان دہ آن لائن مواد سے محفوظ رکھنے کے لیے سوشل میڈیا کے استعمال پر پابندیاں سخت کر رہی ہیں، جبکہ آسٹریلیا پہلے ہی 16 سال سے کم عمر بچوں کے لیے سوشل میڈیا کے استعمال پر مکمل پابندی عائد کر چکا ہے۔