مشرف کے 2 منجمد اکائونٹس میں سے رقم نکلوانے کا انکشاف

راولپنڈی(نمائندہ امت) بینظیر بھٹو قتل کیس کی سماعت کے دوران اشتہاری ملزم پرویز مشرف کے 2 منجمد بینک اکاؤنٹس سے رقم نکلوانے کا انکشاف ہواہے، انسداد دہشت گردی عدالت نے برہمی کا اظہار کیا ۔عدالت نے ایس ایچ او تھانہ ایف آئی اے کو نوٹس جاری کرتے ہوئے 15 فروری تک رپورٹ طلب کرلی -انسداد دہشت گردی عدالت راولپنڈی کے جج اصغر خان نے بینظیر بھٹو قتل کیس کی سماعت کی۔سماعت کے دوران ایف آئی اے کی جانب سے رپورٹ پیش کی گئی، جس میں بتایا گیا کہ سابق صدر اور کیس کے اشتہاری ملزم پرویز مشرف کے 2 منجمد بینک اکاؤنٹس سے رقم نکلوائی گئی ہے۔جس پر عدالت نے سخت نوٹس لیتے ہوئے کہا کہ ‘2 بینکوں کے منجمد اکاؤنٹس میں سے رقم کس نے اور کیسے نکلوائی؟عدالت نے ایس ایچ او تھانہ ایف آئی اے کو نوٹس جاری کرتے ہوئے 15 فروری تک رپورٹ طلب کرلی۔عدالت نے ملزم کی دیگر مکمل پراپرٹی اور اکاؤنٹس کی فہرست بھی طلب کرلی۔واضح رہے کہ انسداد دہشت گردی عدالت نے 31 اگست 2017 کو بینظیر بھٹو قتل کیس کا فیصلہ سناتے ہوئے سابق صدر جنرل (ر) پرویز مشرف کو اشتہاری قرار دیتے ہوئے ان کی جائیداد کی قرقی کا حکم دیا تھا۔
٭٭٭٭٭