ویسٹ انڈیز نے برطانیہ کو کچل ڈالا

برج ٹاؤن (امت نیوز) شمرون ہٹمائر کی ناقابل شکست سنچری اور شیلڈن کوٹریل کی تباہ کن باؤلنگ کی بدولت کالی آندھی نے انگلینڈ کو دوسرے ایک روزہ بین الاقوامی کرکٹ میچ میں 26 رنز سے شکست دے کر پانچ میچوں کی سیریز 1-1 سے برابر کر دی، انگلش ٹیم 289 رنز کے ہدف کے تعاقب میں 48ویں اوور میں 263 رنز بنا کر آؤٹ ہو گئی، بین سٹوکس اور ایوان مورگن کی شاندار نصف سنچریاں بھی ٹیم کو شکست سے نہ بچا سکیں، ہٹمائر نے شاندار سنچری اور کوٹریل نے 5 وکٹیں لیکر ٹیم کی جیت میں کلیدی کردار ادا کیا، ہٹمائر میچ کے بہترین کھلاڑی قرار پائے۔ برج ٹاؤن میں کھیلے گئے دوسرے ایک روزہ میچ میں ویسٹ انڈین ٹیم نے پہلے کھیلتے ہوئے مقررہ اوورز میں 6 وکٹوں پر 289 رنز بنائے، شمرون ہٹمائر نے ڈٹ کر حریف باؤلرز کا مقابلہ کیا اور شاندار سنچری سکور بنا کر ٹیم کی پوزیشن مستحکم کی، ہٹمائر 104 رنز بنا کر ناقابل شکست رہے، کرس گیل 50 رنز بنا کر دوسرے نمایاں بلے باز رہے، کیمپبل 23، شائی ہوپ 33، ڈیرن براوو 25، کپتان جیسن ہولڈر 3 اور بریتھویٹ 13 رنز بنا کر آؤٹ ہوئے، ایشلے نرس 13 رنز بنا کر ناٹ آؤٹ رہے۔
٭٭٭٭٭