خیبر پختونخوا حکومت کے لانگ مارچ کے باعث پشاور میں موبائل سروس معطل

پشاور میں خیبر پختونخوا حکومت کی جانب سے جاری لانگ مارچ کے باعث مسلسل 2 دنوں سے موبائل سگنلز بند ہیں، جس کی وجہ سے معمولات زندگی، کاروباری اور دفتری امور بری طرح متاثر ہوئے ہیں۔ باخبر ذرائع کے مطابق موبائل سروس کی بندش لانگ مارچ کی سیکیورٹی کو محفوظ تر بنانے کے لیے کی گئی ہے اور سروس کی بحالی لانگ مارچ کے چارسدہ روانہ ہونے کے بعد ہی ممکن ہو سکے گی۔

واضح رہے کہ خیبر پختونخوا حکومت کی طرف سے لانگ مارچ کا یہ سلسلہ 4 اکتوبر کو شروع ہوا تھا جو مختلف اضلاع سے ہوتا ہوا گزشتہ روز پشاور پہنچا۔ دریں اثنا، پاکستان تحریک انصاف کے لانگ مارچ کے حوالے سے اہم پیش رفت سامنے آئی ہے جہاں وزیراعلیٰ خیبر پختونخوا سہیل آفریدی نے لانگ مارچ کے روٹ میں دوبارہ تبدیلی کا اعلان کرتے ہوئے اگلے مرحلے کے پروگرام کو حتمی شکل دے دی ہے۔

نئے شیڈول کے مطابق وزیراعلیٰ آج پشاور کے مختلف مقامات پر اجتماعات سے خطاب کریں گے اور رات کا قیام بھی پشاور میں ہی ہوگا۔ لانگ مارچ کے شرکاء کل چارسدہ روانہ ہوں گے اور 10 اکتوبر کو مردان کا رخ کریں گے، جبکہ 11 اکتوبر کو تمام قافلے صوابی جائیں گے جہاں وزیراعلیٰ اگلے لائحہ عمل کا اعلان کریں گے۔ پارٹی کے صوبائی جنرل سیکرٹری علی اصغر نے تمام ضلعی تنظیموں، منتخب نمائندوں اور کارکنوں کو منظم استقبال اور عوامی رابطہ یقینی بنانے کی ہدایات جاری کر دی ہیں۔