آزاد ڈیجیٹل کے سربراہ اور اہلِ خانہ کو مبینہ دھمکیاں،این سی سی آئی اے میں شکایت درج

اسلام آباد: آزاد ڈیجیٹل کے چیف ایگزیکٹو آفیسر اور ان کے اہلِ خانہ کو مبینہ طور پر دھمکیاں دینے اور ہراساں کرنے کا معاملہ قومی سائبر کرائم تحقیقاتی ادارے (این سی سی آئی اے) تک پہنچ گیا ہے۔ اس سلسلے میں ضیاء الرحمٰن، راشد سومرو، ناصر سومرو اور مفتی اویس کے خلاف باضابطہ شکایت جمع کروا دی گئی ہے۔

آزاد ڈیجیٹل کے سربراہ کی جانب سے ادارے کے ڈیسک انچارج عدیل عمر نے شکایت درج کراتے ہوئے متعلقہ افراد اور ان سے منسلک سماجی رابطوں کے کھاتوں کی تحقیقات اور قانونی کارروائی کی درخواست کی ہے۔ درخواست میں سربراہ اور ان کے اہلِ خانہ کے تحفظ کو یقینی بنانے کا مطالبہ بھی کیا گیا ہے۔

شکایت میں مؤقف اختیار کیا گیا ہے کہ ضیاء الرحمٰن اور دیگر افراد نے مبینہ طور پر براہِ راست دھمکیاں دیں، جبکہ مختلف فیس بک کھاتوں سے بھی دھمکی آمیز تحریریں اور تبصرے کیے گئے۔ درخواست کے مطابق راشد سومرو نے مبینہ طور پر آزاد ڈیجیٹل کے سربراہ کو جان سے مارنے کی دھمکی بھی دی۔

درخواست گزار کا کہنا ہے کہ آزاد ڈیجیٹل کے مختلف پروگرام نشر ہونے کے بعد ادارے کے سربراہ اور ان کے اہلِ خانہ کو دھمکیوں کا سامنا کرنا پڑا۔ شکایت میں چار فیس بک کھاتوں کی نشاندہی کی گئی ہے، جنہیں مبینہ طور پر دھمکی آمیز سرگرمیوں سے منسلک کیا گیا ہے۔ ان الزامات کے حق میں متعلقہ تحریروں، تبصروں کے عکس اور ویب روابط بھی فراہم کیے گئے ہیں۔

آزاد ڈیجیٹل نے این سی سی آئی اے سے مطالبہ کیا ہے کہ مبینہ دھمکیوں میں ملوث افراد اور متعلقہ فیس بک کھاتوں کو چلانے والوں کی شناخت کرکے قانون کے مطابق کارروائی کی جائے۔

شکایت میں معاملے کو سنگین اور فوری توجہ کا متقاضی قرار دیتے ہوئے شفاف تحقیقات اور آزاد ڈیجیٹل کے سربراہ سمیت ان کے اہلِ خانہ کی حفاظت یقینی بنانے کی درخواست کی گئی ہے۔