کروڑوں کی مبینہ کرپشن کے الزامات،سی اینڈ ڈبلیو خیبر کے دو ٹھیکے منسوخ

سی اینڈ ڈبلیو ہائی وے ڈویژن خیبر کے تحت دیے گئے دو ٹھیکوں میں مبینہ کرپشن کے سنگین الزامات سامنے آگئے۔ اطلاعات کے مطابق، آفریدی برادران، سہیل آفریدی اور ان کے بھائی، جبکہ ایم پی اے عبدالغنی پر مبینہ طور پر کرپشن کے نئے ریکارڈ قائم کرنے کے الزامات عائد کیے گئے ہیں۔

الزامات کے مطابق، اربوں روپے مالیت کے ٹھیکے مبینہ طور پر من پسند ٹھیکیداروں میں تقسیم کیے گئے، جبکہ پیشگی ادائیگیوں کی مد میں لاکھوں روپے وصول کیے جانے کی اطلاعات بھی سامنے آئی ہیں۔

اے ڈی پی کوڈز 261207 اور 261163 کے تحت جاری منصوبوں میں مبینہ بے ضابطگیوں نے کئی سوالات کھڑے کر دیے ہیں۔

صوبے کی موجودہ حکومت نے مبینہ کرپشن کے الزامات کے پیش نظر دونوں ٹھیکے منسوخ کر دیے ہیں اور معاملے کی تحقیقات بھی شروع کر دی ہیں۔

ان دونوں منصوبوں کے ریکارڈ کا جائزہ لینے سے اس بات کا اندازہ ہوتا ہے کہ خیبر پختونخوا میں عمران خان کے نظریے کے نام پر قائم ہونے والی حکومت کے دور میں مبینہ طور پر عوامی فنڈز کو ذاتی مفادات کے لیے کیسے استعمال کیا گیا۔

ذرائع کے مطابق، کئی دیگر منصوبوں کی تحقیقات بھی جاری ہیں، جبکہ سی اینڈ ڈبلیو سمیت دیگر سرکاری محکموں میں بھی مبینہ کرپشن کے حوالے سے مزید انکشافات سامنے آنے کا امکان ظاہر کیا جا رہا ہے۔