پاکستان کی ریاض میں سعودی آرامکو کی انتظامی عمارت پر حملے کی شدید مذمت،حوثیوں سے حملے فوری روکنے کا مطالبہ

اسلام آباد: پاکستان نے سعودی دارالحکومت ریاض میں سعودی آئل کمپنی آرامکو کی انتظامی عمارت پر حوثیوں کی جانب سے حملے کی کوشش کی شدید مذمت کرتے ہوئے سعودی عرب کے خلاف تمام حملے فوری طور پر بند کرنے کا مطالبہ کیا ہے۔

دفتر خارجہ کی جانب سے جاری اعلامیے میں پاکستان نے حوثیوں کی جانب سے سعودی آرامکو کی انتظامی عمارت کو نشانہ بنانے کی کوشش کی شدید مذمت کی۔

ترجمان دفتر خارجہ کا کہنا ہے کہ حملے کے نتیجے میں خوش قسمتی سے کوئی جانی نقصان نہیں ہوا۔ شہری تنصیبات کو نشانہ بنانا انسانی جانوں اور علاقائی سلامتی کو نظرانداز کرنے کے مترادف ہے۔

پاکستان نے حوثیوں سے مطالبہ کیا کہ وہ سعودی عرب کے خلاف تمام حملے فوری اور غیر مشروط طور پر بند کریں۔ اعلامیے میں سعودی حکام کی بروقت جوابی کارروائی کو بھی سراہا گیا۔

پاکستان نے ایک بار پھر سعودی قیادت اور عوام کے ساتھ غیر مشروط طور پر مضبوطی سے کھڑے ہونے کے عزم کا اعادہ کرتے ہوئے واضح کیا کہ سعودی عرب کی سلامتی، خودمختاری اور علاقائی سالمیت کے تحفظ کے لیے تمام ضروری اقدامات کی مکمل حمایت کرتے ہیں۔

🔊PR No.3️⃣2️⃣3️⃣/2️⃣0️⃣2️⃣6️⃣

Pakistan Strongly Condemns Attempted Attack by the Houthis on Saudi Aramco Administrative Building in Riyadh

🔗⬇️ pic.twitter.com/ybL7R0ROuq

— Ministry of Foreign Affairs – Pakistan (@ForeignOfficePk) November 9, 2026

ترجمان دفتر خارجہ کے مطابق سعودی عرب کی سلامتی پاکستان کے لیے انتہائی اہمیت رکھتی ہے، جبکہ سعودی بھائیوں اور بہنوں کے تحفظ اور فلاح و بہبود کے لیے پاکستان کا عزم غیر متزلزل ہے۔