عمران خان کی فارن فنڈنگ کیس کی درخواست سماعت کیلیے مقرر، سلمان اکرم راجہ کے خدشات

لاہور ہائیکورٹ نے بانی پی ٹی آئی عمران خان کی فارن فنڈنگ کیس سے متعلق 4 سال پرانی درخواست سماعت کے لیے مقرر کردی ہے۔ عدالتِ عالیہ کے جسٹس طارق محمود باجوہ 18 نومبر کو اس کیس کی سماعت کریں گے۔ دستیاب عدالتی ریکارڈ کے مطابق بانی پی ٹی آئی نے 5 نومبر 2022 کو یہ درخواست دائر کی تھی جس میں وفاقی تحقیقاتی ادارے (ایف آئی اے) کی جانب سے کی جانے والی انکوائری کو چیلنج کیا گیا تھا۔ اس معاملے میں وفاقی حکومت اور ڈی جی ایف آئی اے سمیت دیگر کو فریق بنایا گیا ہے، جبکہ لاہور ہائیکورٹ پہلے ہی ایف آئی اے کو اس انکوائری سے تاحکمِ ثانی روک چکی ہے۔

دوسری جانب پاکستان تحریک انصاف کے سیکرٹری جنرل سلمان اکرم راجہ نے وکلا کی جیل میں بانی پی ٹی آئی سے ہونے والی ملاقات پر گہرے شکوک و شبہات کا اظہار کیا ہے۔ جیو نیوز کے ایک پروگرام میں گفتگو کرتے ہوئے انہوں نے خدشہ ظاہر کیا کہ آئندہ بھی مزید منظورِ نظر افراد کو بانی پی ٹی آئی سے ملاقات کے لیے بھیجا جا سکتا ہے۔

جیل ذرائع کے مطابق اس ملاقات کے دوران بشریٰ بی بی بھی موجود تھیں اور وکلا نے ان کے مقدمات سمیت دیگر قانونی امور پر عمران خان سے مشاورت کی۔ سلمان اکرم راجہ کا کہنا تھا کہ اس ملاقات کے کچھ خاص مقاصد تھے اور اس دوران سیاسی امور پر بھی بات کرنے کا موقع فراہم کیا گیا۔

انہوں نے مزید بتایا کہ بانی پی ٹی آئی نے اپنے مؤقف میں واضح کیا ہے کہ وہ گورننس کے لیے چھوٹے صوبوں اور یونٹس کے حامی ہیں، لیکن اس کا یہ طریقہ ہرگز درست نہیں جہاں ووٹ کی عزت نہ ہو اور اتنے بڑے فیصلے کرلئے جائیں۔ ان کا کہنا تھا کہ آئین میں ریفرنڈم کے ذریعے نئے صوبے بنانے کی کوئی گنجائش موجود نہیں ہے، اور جب پورے نظام میں ووٹ کی حرمت ہی پامال ہو رہی ہو تو ریفرنڈم کی حرمت کا تصور کیسے کیا جا سکتا ہے۔

سلمان اکرم راجہ نے اس تاثر کو یکسر مسترد کر دیا کہ حکومت کی طرف سے بانی پی ٹی آئی کے لیے کوئی ڈیل یا ڈھیل کی کوشش کی جا رہی ہے۔ انہوں نے زور دے کر کہا کہ حکومت کے ساتھ کسی بھی قسم کے رابطوں کی باتیں بانی پی ٹی آئی کے حقیقی مؤقف سے بالکل متضاد ہیں۔