یوم علیؓ پرہرقسم کے جلوس اوراجتماعات پر پابندی عائد

ملک بھر میں رمضان کے آخری عشرہ اور یوم علیؓ کے موقع پر ہرقسم کے جلوس اوراعتکاف پر پابندی عائد کردی گئی۔

سندھ میں رمضان المبارک کے آخری عشرے پر مذہبی اجتماعات پر پابندی برقرار رہے گی۔ سندھ حکومت کے اعلامیے کے مطابق کراچی سمیت صوبے بھر میں جلسے اور جلوس کی برآمدگی ممنوع ہوگی، کسی کو بھی کھلے مقامات پر جلسے جلوس کی اجازت نہیں، شہری گھروں میں رہتے ہوئے عبادات کو انجام دیں۔

پنجاب حکومت نے رمضان کے آخری عشرہ اور یوم علیؓ کے موقع پر ہرقسم کے جلوس اوراعتکاف پر پابندی عائد کر دی۔

یوم حضرت علیؓ کے موقع پر پنجاب میں امام بارگاہوں اور گھروں میں مجالس کی اجازت ہوگی، ایس او پیز کے مطابق مجالس زیادہ سے زیادہ ایک گھنٹہ تک جاری رکھی جا سکیں گی۔ ایس او پیز پر عمل نہ ہونے کی صورت میں مجالس کی انتظامیہ کو ذمہ دار ٹھہرایا جائے گا۔

خیبرپختونخوا میں بھی امام بارگاہوں میں ایس او پیز کے تحت صرف مجالس کی اجازت ہوگی، سندھ اور بلوچستان میں تمام مذہبی اجتماعات پر پابندی ہوگی۔ اعلامیے کے مطابق علما حضرات اجتماعات سے گریز کریں۔

پشاور سمیت صوبے بھر میں یوم علیؓ کے تمام جلوسوں پر پابندی عائد ہے۔ محکمہ ریلیف خیبر پختونخوا نے اعلامیہ جاری کر دیا۔ اعلامیے کے مطابق صرف امام بارگاہوں میں ایس او پیز کے تحت صرف مجالس کی اجازت ہوگی۔

کوئٹہ سمیت بلوچستان میں بھی تمام مذہبی اجتماعات پر پابندی ہوگی۔ محکمہ داخلہ کے اعلامیے کے مطابق یوم علیؓ کے موقع پراجتماعات کی اجازت نہیں ہوگی، علما حضرات اجتماعات سے گریز کریں۔