راہول گاندھی نے نریندر مودی کو سرینڈر مودی کا لقب دیدیا

اپوزیشن جماعت انڈین نیشنل کانگریس راہول گاندھی نے لداخ میں چینی فوج کے ہاتھوں شرمناک شکست پر وزیراعظم نریندر مودی کو’’ سرینڈر مودی‘‘ قرار دیدیا۔

سماجی رابطے کی ویب سائٹ ٹوئٹر پراپوزیشن جماعت کانگریس کے رہنما راہول گاندھی نے حکمراں جماعت بھارتیہ جنتا پارٹی اور وزیراعظم نریندر مودی کو’’ سرینڈر مودی ‘‘ قرار دیا، اپنی ٹویٹ میں راہول گاندھی نے جاپان ٹائمزکی ایک خبر کا لنک بھی شیئر کیا جس میں لداخ میں چینی فوج کے ہاتھوں بھارتی فوج کی شکست اور ایک گاؤں پر قابض ہونے کا دعویٰ کیا گیا تھا۔

Narendra Modi

Is actually

Surender Modihttps://t.co/PbQ44skm0Z

— Rahul Gandhi (@RahulGandhi) June 21, 2020

جاپان ٹائمزکے کالم میں بھی مودی سرکار کی ناکام خارجہ پالیسی کو شدید تنقید کا نشانہ بنایا گیاہے جس کی وجہ سے بھارت اپنے ہمسایہ ممالک کو ناراض کر بیٹھا ہے اور خطے میں تنہا ہوتا جا رہا ہے، علاوہ ازیں لداخ کے معاملے میں بھی چین سے گفت و شنید میں بھی اپنے مفادات کا تحفظ کرنے میں ناکام رہی ہے۔

راہل گاندھی نے گلوان میں پُر تشدد جھڑپ کے معاملہ پر وزیر اعظم نریندر مودی کے جمعہ کے روز کُل جماعتی اجلاس کے دوران دیے گئے بیان پر بھی سوال اٹھائے تھے۔

وزیر اعظم مودی نے کہا تھا کہ نہ تو کوئی ہماری سرحد میں داخل ہوا ہے اور نہ ہی ہماری کوئی چوکی کسی دوسرے کے قبضہ میں ہے۔ لداخ میں ہمارے 20 فوجی مارے گئے لیکن جنہوں نے بھارت ماتا کی طرف آنکھ اٹھا کر دیکھا، انہیں وہ سبق سکھا کرگئے۔ وزیر اعظم مودی کے اس بیان پر راہل گاندھی نے سوال کیا تھا اور پوچھا تھا کہ اگر وہ زمین چین کی تھی، جہاں ہندوستانی جوان مارے گئے تو ہمارے فوجیوں کو کیوں مارا گیا؟ انہیں کہاں مارا گیا؟۔

قبل ازیں راہول گاندھی نے لداخ میں چینی فوج کے ہاتھوں بھارتی فوج کے اہلکاروں کی ہلاکت پر وزیراعظم نریندر مودی کی معنی خیز خاموشی کو مجرمانہ قرار دیتے ہوئے شدید تنقید کی تھی اور وزیراعظم سے مطالبہ کیا تھا کہ کہیں چھپ کر بیٹھنے سے بہتر ہے سامنے آئیں اور حقائق بتائیں۔ کیسے چین ہماری سرزمین میں داخل ہوا اور کیسے اسے ہمارے فوجی جوانوں کو قتل کرنے کی ہمت ہوئی۔

Why is the PM silent?
Why is he hiding?

Enough is enough. We need to know what has happened.

How dare China kill our soldiers?
How dare they take our land?

— Rahul Gandhi (@RahulGandhi) June 17, 2020

واضح رہے کہ لداخ میں چینی فوج کے ساتھ جھڑپ میں بھارتی فوج کے 20 اہلکار مارے گئے تھے جب کہ درجنوں کو گرفتارکرلیا گیا تھا، جن میں سے 10 کو مذاکرات کے بعد رہا کر دیا گیا تھا تاہم چین نے بھارتی فوجیوں کی گرفتاری اور رہائی کی تردید کی تھی۔