مالکن کو قتل کرنے والی ملازمہ پولیس موبائل سے چھلانگ لگاکر فرار

سچل کےعلاقے میں مالکن کو نشہ آورگولیاں کھلاکر قتل کرنے کے الزام میں گرفتار ملازمہ پولیس موبائل سے چھلانگ لگاکر فرار ہوگئی۔

پولیس کے مطابق سچل کے علاقے میں گھروں میں کام کاج کے دوران مالکن کو نشہ آورگولیاں کھلا کر قتل کرنے والی 3 ماسیوں کا ملیر کورٹ سے ریمانڈ لینے کے بعد کورونا ٹیسٹ کے لیے سول اسپتال منتقل کیا گیاتھا۔

پولیس کا کہنا ہے کہ تینوں ماسیوں کو گزری پولیس نے گرفتار کیا تھا، اسپتال سے واپسی پر جامع کلاتھ کے قریب شمیم رانی نامی ملزمہ موبائل سے چھلانگ لگاکر فرار ہوگئی۔

پولیس کا کہنا ہےکہ واقعے کا مقدمہ آرام باغ تھانے میں سرکاری مدعیت میں درج کیا گیا ہے جس میں فرار ہونے والی ملزمہ سمیت تفتیشی افسر سب انسپکٹر سردارعمرانی،علی اکبراورلیڈی پولیس اہلکار مریم کو بھی نامزد کیا گیا ہے۔

2 ملازمائیں گھر سے 20 لاکھ روپے چوری کرکے لے گئیں

 دوسری جانب پولیس کے مطابق ڈیفنس میں توحید کمرشل میں گھر میں کام کرنے والی 2 ملازمائیں گھر سے 20 لاکھ روپے چوری کرکے لے گئیں۔

گھر کے مالک نے رقم غائب دیکھی تو ملازمہ مہنازاور فرزانہ سے پوچھ گچھ کی جس پر دونوں نے بتایا کہ انہوں نے ساتھی ظفر کے ہمراہ چوری کی ہے،گھر کے مالک نے پولیس کو اطلاع دی جس پر پولیس نے 13 لاکھ روپے کی رقم برآمد کرلی لیکن باقی رقم ظفر لے کر فرار ہوگیا ہے۔