ٹک ٹاک جنون، امریکا میں بوٹ جمپنگ چیلنج سے 4افراد ہلاک

واشنگٹن(نیٹ نیوز)امریکہ میں ’بوٹ جمپنگ چیلنج‘ وائرل کرنے کی کوشش کے دوران 4 افراد جان کی بازی ہار گئے۔ عالمی خبر رساں ادارے کے مطابق امریکی ریاست الاباما میں سمندر میں تیز رفتار کشتی کے پیچھے سے پانی میں چھلانگ لگاتے اور پلٹتے ہوئے ویڈیو بنانے کے جنون کی کوشش میں 4 نوجوان جان سے ہاتھ دھو بیٹھے۔ٹک ٹاک پر اس ویڈیو کو ‘بوٹ جمپنگ چیلنج’ کہا جا رہا ہے اور چیلنج کو پورا کرنے والے اپنی ویڈیوز وائرل کرتے ہیں۔

چیلنج پورا کرنے کی کوشش میں 4 ہلاکتیں الگ الگ مقامات اور اوقات پر ہوئی ہیں۔ان تمام افراد کی اموات گردن ٹوٹنے کے باعث ہوئیں۔امریکی بحریہ کے اہلکار نے اہل خانہ اور دوستوں پر زور دیا کہ ایسے مہلک چیلنج کو آزمانے کی کوشش کرنے والے اپنے پیاروں کی حوصلہ شکنی کریں۔ یاد رہے کہ ایسے متعددواقعات پہلے بھی ہوچکے ہیں۔