اے اللہ ! فلسطینی بچوں اور عورتوں کے قاتلوں کو برباد کر دے ،خطبہ حج

مکہ مکرمہ: مسجد الحرام کے امام شیخ ڈاکٹر صالح بن عبداللہ نے مسجد نمرہ میں خطبہ حج دیتے ہوئے کہا ہے کہ ایمان والوں کو اللہ سے ڈرنا چاہئے اور تقویٰ اختیار کرنا چاہیے۔

انہوں نے کہا کہ شیطان مسلمانوں کا دشمن ہے اور مسلمانوں کو اس سے دور رہنا چاہیے، مسلمانوں کو آپس میں اتحاد و اتفاق رکھنا چاہیے، اگر کوئی اپنے دشمن کو معاف کرے گا تو اللہ اسے اپنا دوست بنالے گا۔

شیخ صالح بن عبداللہ نے کہا کہ اللہ تعالیٰ نے اسلام کو بطور دین انسانیت کیلئے پسند کیا ہے، اور دین مکمل ہوچکا ہے۔

انہوں نے کہا کہ نیکی برائیوں کو مٹا دیتی ہیں اسی لئے نیکی کی زیادہ سے زیادہ کوشش کرنی چاہئے۔ رسول اللہ صلی اللہ علیہ وسلم نے فرمایا کہ اللہ کی عبادت ایسی کرنی چاہیے جیسے اس اللہ کو دیکھ رہے ہوں۔

امام مسجد الحرام نے کہا کہ دین اسلام کے تین درجات ہیں اور سب سے بڑا درجہ احسان ہے، والدین سے صلہ رحمی، نرمی اور وعدوں کی تکمیل بھی دین کا حصہ ہے اور حیا ایمان کی شاخ ہے۔

شیخ صالح بن عبداللہ نے کہا کہ حج کے دوران اللہ کا بہت زیادہ ذکر کرنا چاہیے، دعائیں کرنی چاہئے اور دنیا و آخرت کی بھلائیاں مانگنی چاہئیں۔ اللہ نے فرمایا کہ نیکی میں ایک دوسرے کے ساتھ تعاون کریں اور بری باتوں سے رک جائیں۔

امام شیخ ڈاکٹرصالح بن عبد اللہ نے حج کا خطبہ دیتے ہوئے فرمایا کہ آج کے دن اللہ نے امتِ محمد ﷺ پر اپنی نعمتیں مکمل کر دی ہیں اور اسلام کو بطور دین پسند فرمایا ہے۔ انہوں نے عبادات کی اہمیت پر روشنی ڈالتے ہوئے کہا نماز، روزہ، زکوٰۃ اور حج اسلام کے بنیادی ارکان ہیں۔ جو ان پر عمل کرتا ہے وہی کامیاب ہے۔

خطبہ میں امام کعبہ نے توحید، نماز، معاشرتی انصاف، پڑوسیوں سے حسن سلوک اور گناہوں سے بچنے کی خصوصی تلقین کی اور فرمایا کہ شیطان تمہارا کھلا دشمن ہے، اس سے ہوشیار رہو۔ نیکیوں کو عام کرو، معاشرے میں محبت پھیلاؤ، اللہ اور اس کے رسول ﷺ کے احکامات پر عمل کرو۔

انہوں نے کہا کہ اللہ صبر کرنے والوں کو پورا ثواب عطا کرتا ہے اور ایمان والوں کو سچی باتیں کہنی چاہئیں، جھوٹ سے بچنا چاہیے۔

امام کعبہ نے ایمان کی تعریف کرتے ہوئے کہا کہ ایمان زبان سے اقرار اور دل سے تصدیق کا نام ہے۔ نماز، حیا، صدقِ کلام، اور فرائض کی ادائیگی ایمان کا حصہ ہیں۔

خطبہ حج میں امام کعبہ نے فرمایا کہ اللہ کے گھر کا حج کرنا تم پرفرض کردیا گیا ہے،اللہ تعالیٰ تمہارے ظاہر اور باطن کو جانتا اللہ کی رحمت تم پر پوری ہوگئی ہے،اللہ تعالیٰ تمہاری عبادات کو قبول فرمائے۔

امام کعبہ نے فرمایا کہ آپ ایسے مقام پر ہیں جہاں دعائیں قبول ہوتی ہیں، اے اللہ ہم تجھ سےمعافی اورفضل مانگتے ہیں اللہ ہمیں دنیا و آخرت کی کامیابی عطافرمائے۔

شیخ ڈاکٹر صالح بن عبد اللّٰہ نے دعا کی کہ اے اللہ فلسطین کے بھائیوں کی مدد فرما، ان کے شہدا کو معاف فرما، زخمیوں کو شفا دے،عورتوں اور بچوں کو قتل کرنے والے ظالموں کو برباد کردے اور ان کے قدم اکھیڑ دے۔

اے اللہ اہل فلسطین کودشمنوں کے شرسے بچا۔انہوں نے دعا کی کہ اے اللہ اہل فلسطین کے معاملات کو اپنےسپرد کرلے اور اہل فلسطین کو دشمنوں پر غالب فرما۔