لبنان میں اسرائیلی فضائی حملوں کے بعد بے گھر افراد دوبارہ نقل مکانی پر مجبور

لبنان کے شہر صیدا میں ایک اسکول کو عارضی پناہ گاہ میں تبدیل کر دیا گیا ہے، جہاں درجنوں ایسے خاندان دوبارہ پناہ لیے ہوئے ہیں جو 17 اپریل کو امریکہ کی ثالثی سے ہونے والی جنگ بندی کے بعد اپنے گھروں کو واپس گئے تھے، لیکن تازہ اسرائیلی فضائی حملوں کے باعث دوبارہ بے گھر ہو گئے ہیں۔

خدیجہ ہاشم نے الجزیرہ سے گفتگو میں بتایا کہ وہ اپنے گھر واپسی کے چند ہی دن بعد اتوار کے روز اسرائیلی حملوں کے باعث دوبارہ گھر چھوڑنے پر مجبور ہوگئیں۔ ان کے مطابق فضاء میں متعدد طیارے موجود تھے، اور پھر ایک ایسے گاؤں کو نشانہ بنایا گیا جسے پہلے محفوظ قرار دیا گیا تھا۔ تقریباً آدھے گھنٹے بعد دوبارہ حملہ ہوا، اور لوگوں کو انخلا کا وقت بھی نہیں ملا۔

ان کا کہنا تھا کہ سڑکوں پر افراتفری پھیل گئی، گاڑیاں قطار میں کھڑی تھیں، اور بعد میں سڑک کو بھی نشانہ بنایا گیا جس کے نتیجے میں متعدد عام شہری ہلاک ہوئے۔ ان کے مطابق یہ حملے بلا امتیاز فائرنگ کے مترادف تھے۔

دیگر بے گھر افراد نے کہا کہ اب انہیں اسرائیل پر جنگ بندی کی پاسداری کا اعتماد نہیں رہا۔ محمد نصر نے کہا کہ اسرائیل جنگ بندی کا احترام نہیں کرتا اور نہ ہی انسانی زندگی کا۔ ان کے مطابق حملوں میں عام شہری نشانہ بن رہے ہیں اور کوئی واضح ہدف نہیں۔