امریکہ کی وجہ سے این پی ٹی مذاکرات ناکام ہوئے۔ایران کا الزام

ایران نے کہا ہے کہ امریکہ نے اقوام متحدہ میں ہونے والے جوہری عدم پھیلاؤ (این پی ٹی) مذاکرات کو “تباہی کے دہانے” پر پہنچا دیا ہے۔

“اقوام متحدہ میں ایران کے مستقل مشن” نے واشنگٹن پر “غیر معمولی اور سخت مطالبات” عائد کرنے کا الزام لگاتے ہوئے کہا ہے کہ اسی وجہ سے جوہری عدم پھیلاؤ مذاکرات ناکامی کی طرف بڑھ گئے ہیں۔

مشن نے سوشل میڈیا پلیٹ فارم ایکس پر بیان میں کہا کہ این پی ٹی جائزہ کانفرنس مسلسل تیسری بار ناکام ہوئی ہے اور اس کی وجہ امریکہ اور اس کے اتحادیوں کی رکاوٹیں ہیں۔

رپورٹ کے مطابق اس سے قبل بھی اقوام متحدہ کی کانفرنس کسی اتفاق رائے تک نہیں پہنچ سکی تھی، جس کی ایک بڑی وجہ امریکا کی جانب سے ایران کے جوہری پروگرام کو مذاکرات میں مرکزی مسئلہ بنانا بتایا گیا ہے، جیسا کہ امریکی غیر منافع بخش ادارے آرمز کنٹرول ایسوسی ایشن نے رپورٹ کیا۔

تہران کے اقوام متحدہ مشن نے مزید کہا کہ جوہری عدم پھیلاؤ کا معاہدہ، جو دنیا کو جوہری ہتھیاروں کے پھیلاؤ سے روکنے اور بالآخر جوہری ہتھیاروں سے پاک دنیا کے لیے بنایا گیا تھا، وسیع تخفیف اسلحہ اقدامات کے بغیر “مستقبل سے محروم” ہے۔