امریکی ڈیموکریٹس کا اسرائیلی بستیوں کی توسیع روکنے کا مطالبہ
مغربی کنارے میں اسرائیلی آبادکاری پر عالمی دباؤ میں اضافہ
امریکی ڈیموکریٹس نے اسرائیل کی غیر قانونی بستیوں کی توسیع روکنے کے لیے وزیر خارجہ مارکو روبیو سے اپیل کی ہے۔
امریکی ایوانِ نمائندگان کے دو ڈیموکریٹ ارکان نے ٹرمپ انتظامیہ سے مطالبہ کیا ہے کہ وہ مقبوضہ مغربی کنارے میں نئی اسرائیلی بستیوں کی تعمیر، خصوصاً متنازع علاقے ای ون میں توسیع کو روکنے کے لیے تمام سفارتی اور قانونی ذرائع استعمال کرے۔
ڈیموکریٹ رکن مارک پوکن نے کہا کہ دنیا کی سب سے طاقتور ملک ہونے کے ناطے ہمیں اپنے اثر و رسوخ کو بروئے کار لاتے ہوئے فوری کارروائی کرنی چاہیے۔
ای ون مشرقی یروشلم کے قریب ایک اسٹریٹجک علاقہ ہے جو مقبوضہ مشرقی یروشلم اور اسرائیلی غیر قانونی بستی معالی ادومیم کے درمیان واقع ہے۔ اس علاقے میں بڑی بستیوں کی تعمیر فلسطینی ریاست کے تسلسل کے امکان کو مزید کمزور کر سکتی ہے۔