ایران نے مفاہمتی یادداشت پر حتمی فیصلہ تاحال نہیں کیا۔عباس عراقچی

تہران سے موصولہ اطلاعات کے مطابق ایران اور متعلقہ فریقوں کے درمیان معاہدے تک پہنچنے کی راہ پہلے سے زیادہ قریب دکھائی دے رہی ہے، تاہم مفاہمتی یادداشت (ایم او یو) پر دستخط کے حوالے سے ایرانی حکام نے ابھی تک کوئی حتمی فیصلہ یا باضابطہ اعلان نہیں کیا۔

ایرانی وزیر خارجہ عباس عراقچی نے 24 گھنٹے قبل بتایا تھا کہ ایران مفاہمتی یادداشت کے مسودے کا تفصیلی جائزہ لے رہا ہے۔ انہوں نے معاہدے کے خدوخال پر روشنی ڈالتے ہوئے کہا کہ اس کا پہلا مرحلہ جنگ کے خاتمے پر مرکوز ہوگا، جبکہ جوہری پروگرام اور پابندیوں سے متعلق اہم معاملات دوسرے مرحلے میں زیر غور آئیں گے، جس کی مدت 60 روز رکھی گئی ہے۔

عباس عراقچی کے مطابق ایران کی سپریم نیشنل سکیورٹی کونسل میں اس معاہدے کے حامی اور مخالف دونوں موجود ہیں، تاہم آخرکار اجتماعی مشاورت کے بعد حتمی فیصلہ کیا جائے گا۔

انہوں نے یہ بھی اشارہ دیا کہ مفاہمتی یادداشت پر دستخط آن لائن یا دور سے بھی کیے جا سکتے ہیں۔ ان کا کہنا تھا کہ اس وقت بنیادی توجہ تمام محاذوں پر جنگ کے خاتمے پر ہے، جس میں لبنان بھی شامل ہے اور اسے کسی صورت نظر انداز نہیں کیا جائے گا۔

وزیر خارجہ نے آبنائے ہرمز، امریکی بحری ناکہ بندی کے خاتمے اور آبنائے ہرمز میں نئی انتظامی صورتحال کا بھی ذکر کیا۔ ان کے مطابق معاہدے سے متعلق پیش رفت آج یا آنے والے چند دنوں میں سامنے آ سکتی ہے۔