مشرقِ وسطیٰ کشیدگی میں کمی کے بعد عالمی منڈی میں تیل کی قیمتوں میں معمولی اضافہ

عالمی منڈی میں خام تیل کی قیمتوں میں پیر کے روز معمولی اضافہ ریکارڈ کیا گیا، تاہم مشرقِ وسطیٰ میں جغرافیائی سیاسی کشیدگی میں کمی کے باعث قیمتوں میں اضافے کی رفتار محدود رہی۔

غیر ملکی خبر رساں ادارے کے مطابق سرمایہ کار اب خطے کی صورتحال کے بجائے خام تیل کی عالمی رسد میں اضافے اور مستقبل کی طلب کے امکانات پر توجہ مرکوز کیے ہوئے ہیں۔

برینٹ خام تیل کے فیوچر معاہدوں کی قیمت میں 28 سینٹ، یعنی 0.39 فیصد اضافہ ہوا، جس کے بعد یہ 72.29 ڈالر فی بیرل تک پہنچ گئی۔ اسی طرح امریکی ویسٹ ٹیکساس انٹرمیڈیٹ (WTI) خام تیل کی قیمت 29 سینٹ، یا 0.26 فیصد بڑھ کر 68.84 ڈالر فی بیرل ہو گئی۔ یہ قیمتیں گرین وچ معیاری وقت کے مطابق 00:46 بجے ریکارڈ کی گئیں۔