ایران پر امریکی حملوں کے بعد عالمی منڈی میں سونا مہنگا

ایران پر حالیہ امریکی حملوں اور مشرقِ وسطیٰ میں بڑھتی کشیدگی کے بعد عالمی منڈی میں سونے کی قیمتوں میں اتار چڑھاؤ دیکھنے میں آیا، جبکہ تیل کی قیمتوں اور امریکی ڈالر کی قدر میں بھی اضافہ ریکارڈ کیا گیا۔

عالمی مارکیٹ میں اسپاٹ گولڈ کی قیمت میں معمولی اضافہ دیکھا گیا، تاہم کاروباری دن کے دوران سونا عارضی طور پر حالیہ کم ترین سطح تک بھی پہنچا۔ دوسری جانب امریکی گولڈ فیوچر کی قیمت میں کمی ریکارڈ کی گئی۔

ماہرین کے مطابق خطے میں جاری کشیدگی، مہنگائی سے متعلق خدشات، ڈالر کی مضبوطی اور بانڈ مارکیٹ کی صورتحال نے قیمتی دھاتوں کی قیمتوں پر اثر ڈالا۔ ان کا کہنا ہے کہ سونے کی مارکیٹ اس وقت نئی قیمتوں کا توازن تلاش کرنے کی کوشش کر رہی ہے۔

تجزیہ کاروں کے مطابق امریکا کی جانب سے ایران پر نئی فوجی کارروائیوں اور ایرانی تیل سے متعلق بعض پابندیوں کی بحالی کے بعد عالمی توانائی کی منڈی میں بھی غیر یقینی صورتحال پیدا ہوئی، جس کے باعث خام تیل کی قیمتوں میں اضافہ دیکھنے میں آیا۔

سرمایہ کاروں کی توجہ اب امریکی فیڈرل ریزرو کے آئندہ پالیسی اشاروں پر مرکوز ہے، کیونکہ شرحِ سود سے متعلق فیصلے عالمی مالیاتی منڈیوں اور سونے کی قیمتوں پر براہِ راست اثر انداز ہو سکتے ہیں۔

دوسری جانب عالمی مارکیٹ میں چاندی، پلاٹینم اور پیلیڈیم کی قیمتوں میں بھی معمولی اتار چڑھاؤ ریکارڈ کیا گیا، جبکہ ماہرین کا کہنا ہے کہ آنے والے دنوں میں جغرافیائی سیاسی صورتحال اور معاشی فیصلے قیمتی دھاتوں کی سمت کا تعین کریں گے۔